Di erschte zwei wuche NZ sind ume wie im flug. Aber alles vo afang a..

..am 3.Jan bini in Christchurch glandet und han uf d Fabienne gwartet dass üsi gmeinsam reis hät chöne los go. I därä warteziit hani denn au grad mol d softversion vo erdbebe chöne miterlebe.. i denä drü nächt hani vier vernoh. S erschte isch bizeli strub xi wills mi idä nacht ufgweckt hät, bim zweite bini am käfälä xi, bim dritte under dä duschi und bim vierte öpis am lese.
mini erschti nach tisch abxeh vom erdbebe chli schärg xi.. do anschiinend öpert übers dach durs fenster vom hostel ibroche isch. So hät ä reisendi ihrn ganze backpack verlore und mir und dä kollegin isch s ganze frisch kaufte esse weg cho. Verständlich dass mir üs nüm so wohl und sicher gfühlt hend döt und bin froh xi woni noch dä zweite nacht am 5.Jan han chöne d Fabienne am flughafe abhole und imne andere hostel übernachte. Isch super schön wiedermol öpert vo dihai um sich zha.. zwar mit dä wortfindig im schwiezerdütsch hani denn doch än churze moment brucht ;)

Am nögschte tag isch denn los gange mitm Straybus üsm fortbewegigsmittel fü di nögschte wuche. Erschte halt isch Kaikoura xi.. do druf sind mir beidi scho extrem gspannt xi sit i mir min reisefüehrer kauft ka han im september ;) will do delphinschwimme als atraktion usgschriibe isch. Für d nomittags tour sind mir knapp zspot cho was zur flog ka hät dass mir am nögschte tag (bevors denn au grad wiiters gange isch mitm bus) scho am sechsi!!! am morge im 15°!!! „warme" wasser mit hunderte vo duskydolphins gschwumme sind. Wunderschös und unvergesslichs erlebnis!

Wiiter ischs gange zum Abel Tasman Nationalpark im norde vo dä südinsle. Do s wetter sich leider immer nonig besseret ka hät isch üsi planti kayaktour wortwörtlich is wasser keit. Hend üs denn mitere gmüetliche und sehenswerte vierstündige wanderig begnüegt ;) und zum vo A (üsm hostel) noch B (start vo dä wanderig) und vo C (endi vo dä wanderig) zrugg noch A zcho hät mer äs wassertaxi mösse neh.. bi dem wellegang isch üs denn au klar worde wieso mir imne wassertaxi sitzed und nöd imne kayak!!

Zwüsched äm nationalpark und äm Franz Josef Glacier hend mir än stopp gmach in Greymouth. Döt isch eigentli nöd viil zxeh xi und drum hend d Fabienne und i üs beschlosse amne Jade Workshop teilzneh. Jade isch ä spezielli art vo stei und d figure wo mir hend chöne drususä schliefe sind ad maorikultur aglehnt xi.

Finally in Franz Josef hend mir s wette ruf üsere siite ka und hend bi blauem himmel (klar s eint oder ander wölkli isch no ume xi) ä achtstündigi gletschterwanderig gmeisteret. Alli hend gmeint als schwiezeri söt mer das doch scho einigi mol gmacht ha, aber nai isch definitiv premiere xi.. aber zu 100% wiiterzempfehle. Isch super schö xi und diä masse a iis isch unvorstellbar. S hät denn schön blau gschimmeret im suneliecht (was anschiinend öpis mit dä igschlossne luftblösli im iis ztue hät und mit dä liechtbrechig..) üsn guide isch no zimli jung xi aber hät super infos geh und interessanti stories parat ka. Aschlüssend a üsn sportliche tag hend mir denn än gratis itritt id hot water pools übercho wo direkt nebed üsm hostel xi sind.. döt hend mir üs schrittwiis vo 36° wassertemp zu 40° ufegschafft und üsi muskle ä chli entspannt.
wiä mer sich cha vorstelle isch mer noch somne tag zimli kaputt und mag nur no go pfuse. Woni ufm weg richtig chuchi xi bin hät mi so halbe öpert agsprunge (ich als ängschtlichi oder liecht zverschreckendi person) total usm hüsli.. bisi realisiert han dass äs d Charlotte isch (mini fründin woni din Australie umegreist bin) und wiiters hani au no än typ troffe (Oliver) woni in Vietnam zämä greist bin und mini Kitesurfversüech gmacht han. Also ein grosses Wiedersehn und nix mit schlofe J

Nögschte halt uf dä straybus route isch Queenstown xi. d stadt in New Zealand für alli mögliche extrem sportarte: Bungy, Skydive, Canyoning, Rafting, Speedboat…
do dä wetterbricht aber nöd so rosig xi isch fü di nögschte täg hend mir no än abstecher noch Dunedin gmacht. Und somit hend mir au d chance ergriffe pinguine, albatross, seelöwe und robbe im real life chöne zbestuune. Eimoligs erlebnis und ebefalls unvergesslich!! Unvergesslich isch au das idä nögschte 24h mini kamera dä geist ufgeh hät und dä fabienne ihri verschwunde isch uf dä reis zrugg noch Queenstown. So hend mir denn gmeint mir heged all üsi schnüsige pingufotos verlore.. aber mit paar telefons und viermol anderscht verbunde zwerde hend mir diä situation wenigstens chöne rette und d kamera isch zwei tag spöter per bus zrugg bi üs xi. i denä zwei tag in Queenstown hät d Fabienne gueti nerve bewiese und än bungysprung us 134m höhi gmacht (segi dä zweit wenn nöd dä högschti vo dä welt!!) ah jo und will das jo nur än 8.9sec freiefall xi isch hät sie am nögschte tag grad no mitmne skydive us 12000ft noh dopplet. I has chli gmüetlicher gno.. han mir ä genaii neui kamera gleischtet woni etz wiä än riise freudeler am usprobiere bin J und bin amne schöne tag no än hügel ufe grennt zum d ussicht gnüüsse.

Jetzt sind mir ufm weg zrugg noch Christchurch mit stopps in Mt Cook (aoraki means cloud pisser.. explanation from our bus driver dippy) und Rangitata (was gar kein ort isch sondern grad mol än fluss)!

S allgemeine reise mitm straybus isch sehr praktisch wemer ällei underwegs isch, do mer schnell viili glichgsinnti um sich hät und mer als gruppe durs land reist. Vereinzelt bliebed paari denn länger amne ort und denn stieged wieder äs paar neui gsichter zue, dos freii sitz geh hät. Dä busfahrer selber stellt denn di mögliche aktivitäte vom nögschte ort vor und au d übernachtig wird eim organisiert.. alles natürli mitmne gwüsse rabatt ;) s einzige womer sich muess dra gwöhne isch dass d reiseroute zimli vorgeh isch.. dä bus macht zwar a dä bekannte viewpoints än fotohalt aber sich spontan imne abglegne dörfli für eis zwei tag niederzloh isch denn scho fast unmöglich oder idrgendwo abzchürze sodass mer än tag gwünnt und wo anders chönti bruche.. so flexibel ischs denn leider nöd. DARUM werded d Fabienne und i üs für ihri letschte füf täg än chline van (JucyBus) in Auckland miete, sodass sie d must dos und sees vo dä nordinsle au no ohni stress cha erlebe. Ah jo und gfahre wird wiiterhin uf dä linkesiite J

Liebi grüessli us NZ.. sweet as (standardspruch vo dä kiwis!).. olivia