Viili vo eu werded sicher scho idä berge xi si und i hoffe ihr gnüssed diä riisige menge a schnee au bizeli fü mi mit (inkl. après ski!). Bi mir in New Zealand sötis eigentli summer si aber s wetter macht chli was äs will. Zimli grossi schwankige idä temperature.. und so lernt mer flexibel zsi mitm plante programm und nimmt jede tag grad wiäner chunt.

In Auckland glandet, hend mir grad aschlüssend d schlüssel für üsn Jucy Van (üses dihai für füf täg) entgege gno und üs uf dä weg gmacht noch Waitomo. Waitomo isch bekannt für verschiedeni unterirdischi höhlegäng womer tuusigi vo glüehwürmli atrifft. Dä ablick vo all denä glüehwürmli (wenn alli touris ihri stirnlampe usgschaltet hend) erinneret stark anän sternehimmel. Bi tagesliecht xehnds weniger schön us.. än chline eklige wurm wo chlebrigi fäde produziert.. i denä fäde söttet sich insekte verfange wo dur s lüchte vom würmli idä dunkelheit azoge werded.
Noch zweistündiger wanderig im höhlelabyrinth sind mir denn froh xi wieder tagesliecht zxeh und nochere wohlverdiente warme duschi (will s höhlewasser zimli chüehl xi isch und mir teilwiis fast scho hend mösse schwimme) ischs mitm van wiiter gange noch Rotorua.

Wo mir in Rotorua acho sind ischs denn au scho dunkel xi und mir hend üs no än geignete platz für üsi übernachtig mösse sueche. Was sich als interessanti ufgob usegstellt hät. Do mir jo i üsm van chönd pfuse hend mir nöd unbedingt wölle no extra fürn campingplatz zahle. Noch mehrmohligem nohfroge hend mir schlussendli äsplätzli direkt amne seeufer gfunde, wos anschiinend niemert gstört hät dass mir döt übernachted hend. Will wenn mer imne verbot camped chunt än Ranger högscht persönlich und druckt eim ä 200$ rechnig id hand.. hend mir ghöre sägä.. zum glück nöd mösse erfahre ;)
Aktivitäte in Rotorua:.. am morge bsuech vonere maori schuel (versch wunderschöni schnitzereie, traditionlle tanz und gsang, kiwi huus wod imne dunkle ruum zwei kiwis häsch chöne bestuune,.. ) und am nomittag mud spa, sprich 20min dreckle imne pool voll schlamm J was gits schöners?!?
Rotorua selber hät zimli speziell gschmöckt.. s ganze sulfat idä luft vo all dä mud pools und geysire, obwohls chli noch fuule eier schmöckt gwöhnt mer sich doch zimli schnell dra (äs isch bi wiitem nöd so intensiv wiä dä gschmack wos im igang vom bad in unterrechstei hät!). nebed eim hot water pool/geysir womer s wasser richtig xeh hät sprudle häts äs schild ka mit dä info.. wenn äs schwein wör dri keie würdis zwei stund go bis mer s fleisch chönt esse J
Total entspannt ischs denn wieder wiiter in norde gange richtig Coromandel. Noch längerer fahrt sind mir denn exakt zum richtige ziitpunkt vom tag, nämli ‚Ebbe', am Hot Water Beach acho. Für 5$ mieti füre schüfeli ischs an strand gange zum äs loch buddle wo mir chönted dri sitze (hends bim fuessbad beloh, do s wetter sehr wechselhaft xi isch und jede moment hetti chöne afange regne). Will amne bestimmte platz flüsst ä heissi quelle dure bis is meer.. wiä mer diä findet? Eifach dä menschemengi folge ;) siehe foto!!
Noch 1.5h sändele und chind si hät üs s wetter denn doch nöd länger am strand bhalte und mir sind wiiter düüset wiiter richtig norde. Neui mission: finde ‚New Chums Beach' eine vo dä Top 20 vo dä welt (empfole worde dur üsn busfahrer vo dä südinsle). D region Whangapoua hend mir ohni wiiteres gfunde, aber dä strand wo mir döt xeh hend hät üs nöd sooo beidruckt. Dos aber no biz hell xi isch und mir us dä letschte zwei nächt glernt hend, hend mir scho mol agfange choche und schnipsle fürn feine pastasalot. Wo d Fabienne denn umweltbewusst ;) isch go d maisdose go recyclehät denn än lokale Kiwi gmeint mir mössed denn luege und ufpasse mitm campe, wills im wiitere umfeld verbote isch.. und noch wiitere froge wiä.. woher? Reiseroute? Etc.. hät er üs offeriert uf sim land chöne z parkiere. Ohne worte.. siehe fotos.. mir sind eimol meh glückspilze xi und hend d fründlichkeit vo dä Kiwis erfahre (au di richtig wegbeschriibig zum New Chums Beach hend mir no übercho und sind dä natürli am nögschte tag go gnüüsse und bewundere).
und so ischs denn au scho gli wieder richtig auckland gange.. glücklich noch füf täg wieder ä richtigi duschi zxeh sind mir frisch und munter denn no chli id stadt go shoppe und di letschte postcharte sind gschriibe worde, bevors denn scho wieder gheisse hät abschiid neh L sind drü super wuche xi mit viil unvergessliche erlebnis.. öbs aciton, wetter oder reiseroute agoht.

Für mi ischs denn wiiter gange mitm straybus wieder richtig süde. Do sich di eint oder ander station mit mine letschte täg im jucycar krützt hend hanis so chli gmüetlich gno und so bim allgemeine BBQ mitgholfe. Luschtigerwiis hani dä glichi busfahrer ka wie uf dä südinsle und au sus paar bekannti gsichter im bus.
in Raglan am surferparadies vo NZ hani iplant ka ca vier tag z blibe, do aber dä wetterbricht zimli übel usxeh hät hani probiert umzbueche und am nögschte tag mit miner gruppe wiiter z reise. Leider häts gheisse dä bus segi bis uf dä letschti sitz usbuechet. Somit hani mi ufs usschlofe am nögschte morge gfreut.. aaaber öpert hät denn am achti am morge a miner tür klopfet und gmeint öpert segi nöd erschiine und i chöni doch mitcho J isch denn chli hektisch xi allesz packe, aber bis etz (1.5wuche spöter hani immer no s gfühl i han nix vergesse!).

Als nögschts ufm programm isch xi ä kulturnight wo mir selber mitwirked. Sind alli sehr gspannt xi was üs erwartet. Fraue und männer sind denn trennt worde, do d jungs än teil vom haka (traditionelle tanz wo nur dä männer gstattet isch) und mir fraue hend ‚poypoy' glernt.. was meh oder weniger ä ‚chugle' amne seili isch und diä schwingt mer denn rhythmisch und d hüfte nöd vergesse ;) nochere halbestund training hend mir üs s glernte gegesittig vorgführt.. wiitzigi sach xi und interessant integriert zwerde i dem kulturelle teil.

Füeh ufgstande und mit zwüschestopp in Rotorua ischs noch Taupo gange uuuund…
tadadadaaa.. bin spontan usm flugzüg gumpet. Wie äs paar vo eu wüssed hani vor guet 3.5johr mit dä Romina än Skydive gmacht und ha unbedingt das gfühl nomol wölle erlebe. D ussicht isch phänomenal xi.. 45sec freie fall überem gröschte vulkansee vo NZ wenn nöd vo dä welt.. gigantisch!! Ganz eifach nur wow und definitiv allne zempfehle wos no niä gmacht hend.
am gliche obig hät üs üsn busfahrer zumne natürliche hotwater pool brocht wo mir mitmne bier hend chöne entspanne J äs isch wiä ä heissi quelle xi womer chan drisitze und schwitze und zum abchüehle hät mer chöne in fluss gumpe. Pure natur spa!! J

Di nögschte drü täg sind mit viiii viil wandere verbunde xi was üs aber zu einzigartig schöne ussichtspünkt brocht hät. 1.tag zweistündigi uphill wanderig. 2.tag Tongariro Alpine Crossing.. sibestündig und eini vo dä top 10 also sehr bekannt (i has zuvor no niä ghört J). 3.tag drüstündigi wanderig zumne wasserfall. Und jo noch all dem laufe häts jede obig ä entspannti stund im jacuzzi geh!

Wellington d hauptstadt vo New Zealand hät viiles z büte wasi im vorus ghört han.. aber wasi erlebt ha isch für mi öpis eimoligs xi.. meh do dävo im nögschte NZ blog. Bin zwar scho wieder richtig norde unterwergs aber bhalt mir no öpis uf für min folgende bricht.. do i jo i guet zwei wuche scho richtig Miami unterwegs bin.