Profile
Blog
Photos
Videos
Inca Trail zu Macchu Picchu
Inca Trail - Tag 1
Itz isches auso sowit gsi, der Inca Trail isch vor der Tür gstande. Mir hei dNacht in Ollantaytambo verbracht, wo mir am Tag 1 vom Inca Trail am morge am 8i vo üsem lokale Guide, em Johan mitemne chline Van abghout si worde. Us üsere Reisegruppe si mir totau 6 Persone gsi, wo dä Trail i Agriff gno hei u de si mir no mitere angere G-Adventure Gruppe zämegmischlet worde für die 4 Tag Hike. Totau si mir 15 Persone gsi. Nach rund eire Stund Fahrt si mir bim Startpunkt vom Inca Trail, bim Kilometer 82 acho. Dert hei mir üsi Hikingsticks gfasset u üs mit Sunnecreme u Insektespray vor Sunnebrand u Moskitos gschützt. Derwile hei die sogenannte „Porters" üses Gepäck gwägt u kontrolliert, ob o ke Täsche meh aus 6kg schwär isch. Ufem Inca Trail wird jedem Bsuecher vomne Porter 6 kg jewius ids nächschte Schlafcamp treit. Weme meh wot mitnä, muessme die überschüssige kg säuber trage. Aber da mir erwartet hei, ds mir mit Loufe scho gnue beschäftiget wärde si, hei mir üs ziemlech strikt a die 6kg ghaute u i üsem Tagesrücksäckli nume znötigschte säuber mittreit.
Bevormer de ändlech hei chöne los loufe, hei mir no e Ticket- u Passkontroue müesse passiere u schwupsdiwups hei mir scho der erscht vo totau 4 Inca Trail Stämple i üsem Pass gha. Nähr hets no e Fotosession gä u de si mir los däselet. Der erscht Bitz vom Inca Trail isch entlang vom Fluss Rio Urubamba gange u mir hei e super Ussicht ufe 5700m höch Schneebärg gha. Es isch ziemlech sunnig gsi a däm Tag u mir hei bi super warme Temperature chöne dür die troumhafti Landschaft wandere. Der Wäg isch a däm Tag mehrheitlech äbes wägs oder nume liecht ufe u wieder abe gange. Nume grad ei grössere Ufstieg hei mir am morge müesse überwinde u dert hets üs vor Hitz de doch dSchweisströpfli usedrückt. Obe acho hei mir hurti chli verschnuffet, bevor üs üse Guide dGschicht rund um die erschti Inca Ruine Q'Entimarka verzeut het. Nähr si mir nomau guet 2h gwanderet bis mir de am Nami in Wayllabamba uf 2'980müM i üsem erschte Übernachtigscamp acho si. Üsi Porter si natürlech scho dert gsi u hei bereits aui Zäutli ufgsteut gha u hei üs mit Applous im Camp begrüesst. Für jede isch oscho es Beckeli mit warmem Wasser bereit gstande u mir hei üs chli chöne wäsche, bevor mir mitemne super feine zMittag verwöhnt si worde. Zweltbeschtä Chnoblibrot, Fisch, Riis, Härdöpfu u Gmües u der Täuerservice het usgseh aus ob mir imne Restaurant wäre, aber ds isch aues ire Fäudchuchi kochet worde. Die Chochkunscht ir Natur use, het üs de no es paar Mau immer wieder überrascht u gmacht zstune. Am Nami hei de üsi Jungs u der Guide no es Fuessbaumätchli gäge dPorters gspiut. Nachem Znacht het üs der Johan ds Programm vom nächschte Tag akündet u da mir erfahre hei, ds mir am haubi 6i müesse ufstah, si mir de scho gli ungere u hei üs ufne erschti chüehli Nacht im Zäut igsteut.
Inca Trail - Tag 2
Morge am haubi 6i u mir wärde vore nätte Stimm vomne Porter gweckt, wo üs oscho es Tassli warme Cocatee ids Zäut inestreckt. Der Tee hiuft bim Wach wärde u vor üsem Zäut stöh kurzum oscho wieder zwöi Beckeli mit warmem Wasser zum Wäsche. Üs isch die Umsorgig scho bau chli unagnähm gsi, aber die ghört genau so zum Inca Trail, wie ds länge Wandere u Schwitze.
Itz isch auso der berüehmt berücktigt zwöit Tag vom Inca Trail agstande. E länge Ufstieg het uf üs gwartet. 1'200 Höhemeter hets a däm Tag goute züberwinde u wieder es paar hundert Höhemeter abe. Mir hei drum es guets Zmorge mitere Suppe, emne gfüute Omelett u Brot becho. Um die 7ä si mir de nähr gsattlet gsi u ir Cheuti los glofe. Zersch simer am Checkpoint 2 verbi cho, womer aui üse 2. Inca Trail Stämpu i Pass hei becho u nähr simer guet 45 Minute zum erschte Raschtplatz ufe glofe. Mir hei es ziemlech zügigs Tempo druf gha u no paar Wanderer überhout u si überraschend schnäu bim erschte Raschtplatz gsi. Weme ir Sunne glofe isch, isches oscho wieder extrem warm worde u ds Schnufe isch vo Schritt zu Schritt müehsamer worde. Übrigens hei mir üs beidi no e Ercheutig igfange paar Tag vorem Inca Trail u si üs nid sicher gsi, ob mir überhoupt ufe Trail chöi oder obs besser wär nid zga, wägem Schnufe. Aber bis zu däm Raschtplatz isches einigermasse gange u dNatur u dUssicht uf au die Bärge isch so idrücklech gsi, dses würlech schad wär gsi, wemer nid wäre gange. Mir heis auso nid bereut, ds mir trotz Ercheutig gange si u haut anstatt dür dNase chli meh dür ds Muu gschnufet hei. Der nächscht Abschnitt vom Inca Trail isch eine vode zwe hertischte gsi. Rund angerhaub Stund isches itz nume ufe gange u zwar über Stägene. dStuefe si zum Teil so höch gsi, dses meh klättere isch gsi, aber es het ghoufe, weme im Zickzack um die Steine glofe isch u nid gredi grad drüber ufe isch. Ufem Wäg ufe hei mir de geng chlini Pöiseli gmacht u hurti chli gschnufet, während üs der ander Guide, der Olaf, Sache über dBäum u dBlüemli am Wägrand verzeut het. Vor Landschaft här si mir itz eher imne dichte Waud gsi, wo bereits chli Rägewaud-Ifluss het gha u dLuft isch warm u chli füecht gsi, was mir bim Schnufe guet gmerkt hei. So simer Schritt für Schritt ufe u doch froh gsi, womer a üsem zwöite Raschtplatz a däm Tag in Llulluchapampa acho si. Dert hei mir üs de es Znüni gönnt u hei gwartet bis aui vor Gruppe acho si. Anderi Tourabieter näme dert e richtig Lunch zue sich, d.h. ihri Porter schlöh de wieder dÄssenszäut uf u es wird richtig kochet. Da aber nähr no der Ufstieg zum Gipfu vom Death Woman Pass uf üs gwartet het u sichs mit vouem Mage nid so guet laht la loufe, hei üsi Guides entschiede, ds mir der Lunch de ersch am Nami im nächschte Übernachtigscamp zu üs näme. Ds heimer eigentlech ziemlech ilüchtend gfunde u gar nid gross hingerfragt. Nach däm Rascht simer du nomau guet angerhaub Stund obsi glofe. Mir si itz bereits uf rund 3'800müM gsi u ds heimer bi jedem Schritt nume zu guet gmerkt. Mir si innert kürzischter Zit usser Atem cho u mit jedem Schritt richtig Death Woman Pass uf 4'201müM isch dLuft dünner u dünner worde. Drum hei mir aus Team Swiss e Rhythmus vo 100 Schritt u nähr 10 Atemzüg agno u hei so die letschde Höhemeter überwunde. Itz isch jede i sim Tempo glofe u es paar si mitem Johan vorne wäg glofe u es paar si witer hinge schön gmüetlech Schritt für Schritt däselet. Mir si nöime ir Mitti mit üsem Rhythmus Stückli für Stückli am Pass entgäge glofe. Bide letschde paar Schritt si de dBei würklech langsam schwär gsi u glich ischme eifach geng witer, wüume der Gipfu vor sich gseh het u unbedingt ufe het wöue. Entsprächend erlösend isch zGfüuh gsi, wome obe acho isch u der ganz Wäg unger sich gseh het, wome zrüggleit het. U mir hei eifach nume die mächtige Bärge uf üs la würke u dUssicht gnosse. Ufem Gipfu isches chli zügiger gsi u mir hei üs warm müesse alege, derwile mir gwartet hei bis aui vor Gruppe obe acho si. Nähr hei mir die Leischtig ufemne Gruppefoto feschtghaute u hei üs mit scho bau chli knurrende Mäge ufe Abstieg gmacht. Bis zum nächschte Camp simer no guet e Stund uf der andere Site vom Pass abeglofe u dert vomne Porter mitemne „GAP"-Schiudli scho erwartet worde. Im Camp acho hei üs dPorter natürlech wieder apploudiert für üsi Leischtig, aber ds isch wieder es ziemlech ironischs Gfüuh gsi. Si sie doch am morge nach üs im letschde Camp gstartet u hei der ganz Wäg über 25kg uf ihrem Bugu treit u si vor üs scho ume im Camp gsi u hei aues ufboue. Sie si die wahre Heude vom Inca Trail u mache die 4 Tag zu däm grosse Erläbnis, wos isch für üs Tourischte. Nachdäm aui im Camp acho si, hei mir ziemlech hungrig üse Lunch gnosse u nähr hei sich die meischte fürnes Nickerchen i dZäut zrug zoge. Am früechere Abe hei mir de no chli Karte gspiut u der Choch het üs mitemne üppige Zvieri verwöhnt…Popcorn, frittierti Chäs- u Öpfutäschli, Krackers… jede het öpis gfunde, wo eim gmundet het u mi isch auso würklech nid zchurz cho.
Nachem Znacht u der Info zum nächschte Tag hei mir de aui no chli Karte gspiut, bevor mir müed u erschöpft i Zäut kroche si. A däm Abe het üs der Johan no e Gschicht vomne aute Ma verzeut, wo hie i de Bärge wohni u der Bärggott sig. Weme ihm begägni, söumer ihm unbedingt öpis schänke, paar Cocablätter oder es Täfeli oder wasme de grad findi, süsch wärdi är unzfriede mit üs si u üs wärd öpis böses zuestosse. O we ds nume e Mythos isch, hei sich während der Nacht paari überleit, obme äch itz für nume hurti uf ds WC doch gschider dCocablätter söu mitnä, fausme am aute Ma würd begägne…
Inca Trail - Tag 3
Tagwach um die viertu ab 5i mit Cocatee u warmem Wasser im Becki. dMotivation für zLoufe isch a däm morge nid wahnsinnig gross gsi. Nachem zMorge um Passiere vom dritte Checkpoint het nämlech scho wieder e Uftsieg uf üs gwartet. dStuefe hei a däm morge no grösser gschune u niemer het so richtig möge. Nach 40 Minute simer de bir nächschte Inca Ruine Runkuraqay acho u Johan het üs viu interessanti Informatione über die Inca Ruine verzeut u witergä. Aber es si aui no chli müed gsi u es isch no ziemlech chaut gsi, da dSunne no nid dervor isch gsi. Nach däm Pöiseli heimer de der letschd richtig steil Astieg zum Gipfu vom Runkuraqay Pass i Agriff gno. Mir si ume aui i üsem Tempo glofe u hei dobe de uf aui gwartet. dGuides si ganz hinge glofe u si äuä ziemlech nach üs gstartet u nähr ufegrennt aus chlises Höhetraining für sie. Sie si emu aus letschds u ziemlech usser Atem obe acho. Nach däm Pass het de der Abstieg zur Inca Ruine Sayacmarca uf üs gwartet. Die steile Stuefe abezlofe isch no bau unagnämer gsi aus die steile Stuefe ufezloufe. Hets doch zum Teil bau chli überwindig brucht, der nächscht Schritt znä u die Stufe abezstiege. Bir Inca Ruine acho, het der Johan üs witer i dReligion u dGschicht vode Incas igfüehrt. Sini Usfüehrige si zwar sehr interessant gsi, aber irgendwie si mir aui so müed gsi, ds mir chli dermit kämpft hei, ds üs dÖigli nid zue gheie derwile mir dert gmüetlech am Bode ghöcklet si. Ds heter äuä gmerkt u isch chli hässig worde. Drum simer, bevor no aui am döse si gsi, schlöinigscht witer glofe. Itz het eine vode schönschte Teile vom Inca Trail agfange. Mir si itz im Rägewaud-Gebiet gsi u nachmene kurze uf u ab simer uf der Ahöhi vom Bärg glofe. Leider si aber ziemlech Wulke ufzoge u mir hei nid sehr wit i ds Tau abegseh, aber ds Loufe i de Wulke isch glich es super Erläbnis gsi. Entgäge aune Vermuetige dr Inca Trail sig sehr touristisch u es heig viu Lüt ufem Wanderwäg si mir die ganze rund angerhaub Stund bis zum nächschte Raschtplatz allei glofe u mängisch hei mir üs scho gfragt, ob mir no ufem richtige Wäg si. Aber da üs zwüschine ume e Porter überhout het, heimer gwüsst, dsmer no ufem richtige Pfad si. Bim Raschtplatz acho hei dPorter scho üses Ässenszäut ufgschlage gha u mitemne super Lunch uf üs gwartet. Es het ume auerlei Feins gä u mir hei nach dere Wanderig so Hunger gha, dsmer aui tou drigschlage hei. Aus grossi Überraschig heimer zum Dessert de no e Turte becho, was üs uf über 3'000müM fasch unmüglech het dünkt zum mache. Aber mir hei die Turte i voue Züg gnosse u dLeischtig vom Choch sehr gschätzt. Mit dere Stärkig im Mage heimer no der letschd Abstieg a däm Tag i Agriff gno. Abe zur Inca Ruine Intipata, wo üs der Olaf nomau Gschichte zude Incas verzeut het u mir hei dert zum erschte Mau der Blick ufe Bärg Machu Picchu chöne gniesse. Wos du chli het afa tröpfele, simer schlöinigscht witer glofe u Stuefe um Stuefe abegstiege zum letschde Camp Winaywayna. Dä Absteig isch ziemlech breckär gsi u es paar Mau hei mir üs gfragt, wieso äch hie nid meh Unfäu passiere, we die Porter so schnäu die steile Stuefe abeseckle. Aber es isch äuä eifach ds Training, wos usmacht u bekanntlech macht ja Übung den Meister. Währedem Abstieg heimer no es Pöiseli uf de Terrasse obem Camp igleit u eifach nume dUssicht über dAnde u ufe Bärg Macchu Picchu gnosse u dRueh uf üs la würke. Im Camp acho, heimers richtig gnosse ume uf 2'650müM zsi u richtig agnähm chöne dürezschnufe, mau abgseh vor Beiträchtigung vor Ercheutig. Ds Zvieri hei mir de usegla u stattdesse es Nückli gno. Zum Znacht si mir nomau super verwöhnt worde u aschliessend hei mir de Porters u de Chöch no üse Dank usgsproche u ihne es Tip übergä. Am nächschte Morge isch Tagwach uf die viertu ab 3 agsetzt worde, dermit Porters de o rächtzitig aues chöi zämerume u ihre einzig Zug am haubi 6i am morge verwütsche, was für üs bedütet het, ds mir uf ke Fau hei wöue, ds sie dä Zug verpasse u mir drum gli mau ungere si, dsmer de am viertu ab 3 o ufmöge.
Inca Trail - Tag 4 / Macchu Picchu
Es isch du schneuer viertu ab 3 gsi aus üs rächt isch gsi u mir si no ziemlech verschlafe gsi, aber da mir gwüsst hei, ds Porters Zit zum aues zämerume bruche, si mir ufgstande u hei üsi 7 Sache packt u si oscho bau am zMorgetisch ghocket. Hurti chli Brot u es Tee u nähr heimer ds Zmorge oscho hinger üs gha, nähr si mir nume 5 Minute zum Checkpoint Nr. 4 vom Inca Trail glofe u hei dert guet angerhaub Stund müesse warte, bis zTor für zu Macchu Picchu am haubi 6i ufta isch worde. Ir Cheuti höcklend hei mir chli Musig glost u no chli döset. Pünktlech uf die haubi 6i hets de ono afa rägne u mir hei fasch aui üsi Rägepontschos gsetzt, dermit dRucksäck nid nass wärde. Wie gseit fasch aui, ussert ds Team Kanada. Die zwöi Schwoschte si siech nämlech no nid einig gsi, ob dSterki vom Räge a däm morge de o gnue isch für ihri Emergency Pontschos. So si sie du de afe ohni los glofe u hei nach kurzer Zit aber scho nachere Pouse gschroue, dermit si ihri Emergency Pontschos chöi alege, da der Räge äuä doch ihrne Emergency Kriterie entsproche het. Der Johan het a däm morge wöue, ds mir aui schön zäme blibe u zügig loufe, dermit mir aus erschti Gruppe zSunnetor zu Macchu Picchu erreiche. Planet wär gsi, ds mir die Strecki i angerhaub Stund marschiere, aber da är so gsecklet isch, simer du de scho i 50 Minute dert gsi. U die meischte si ziemlech hässig gsi (v.a. zMeli), wüu sie itz nid nume vom Räge, sondern ono vom Schweiss völlig nass dert obe si acho u ds hät ja eigentlech nid müesse si, weme sich bim Loufe die entsprächendi Zit gno hät. Aber dUssicht uf Macchu Picchu im Morgegraue isch glich ziemlech beidruckend gsi u mir hei aue Chummer schnäu vergässe. Hurti paar Fotos u nähr hei mir der letschd Abstieg abe zur gheime Stadt Macchu Picchu no unger dFüess gno. Dert acho, heimer natürlech grad es Gruppeföteli müesse mache, um üse Erfoug um die Leischtig Inca Trail fescht zhaute. Nachere kurze Sterchig het üs de der Johan dür die Incastadt gfüehrt u üs i rund zwe Stund aui Gschichte derzue verzeut. Nähr hei mir no tou Zit gha dä phenomenau Ort säuber chli zerchunde u die obligate Föteli zmache. Da mir aber doch ziemlech tilt si gsi, heimer gäge Mittag der Bus abe zu Macchu Picchu Peplo gno u üs dert e Pizza u es Bierli göhnt. Ds hei mir üs schliesslech hert verdient mit däm Hike. Am Nami isches de mitem Panoramazug zrug uf Ollantaytambo u vo dert mitem Bus zrug uf Cusco.
Inca trail zu Macchu Picchu… üses Südamerika Highlight!
- comments