Profile
Blog
Photos
Videos
Fortsetzig u Ende Peru - Arequipa zu Mancora
Arequipa
Nachdäm mir üs in Cusco no paar Täg vom Incatrail erhout hei u paar Suvenirs gshoppet hei, si mir mitemne nächschte Nachtbus uf Arequipa. Arequipa isch es härzigs Städtli mitere gmüetleche Plaza, wome vode Terrasse vode Hüser e super Ussicht über aues het. Ds hei mir de bimne gmüetleche Fanta mit au de ladies vo üsere Gruppe o gnosse. Am Nami simer mau wieder live ga Schutte luege. Arequipa gäge Universitario de Deportes vo Lima u ds Heimteam het glücklecherwis gwunne, drum isch dStimmig im Stadion ziemlech guet gsi. Nume dSunne het vou uf üs abebränntet u mir hei müesse ufpasse, ds mir üs nid grad e Sunnebrand hole. Am Abe simer de mit der ganze Travelgruppe i Kino irgend e Superheudefium ga luege. Nachdäm mir aber die RIESE Box Popcorn, wos dert viu zgünschtig gä het, nume haub läär hei möge ässe, si mir vor Erschöpig igschlafe u ersch ume erwachet, wo der Fium verbi isch gsi. Arequipa isch de am nächschte Morge üse Usgangspunkt gsi für i Colca Canyon.
Colca Canyon
dAfahrt i Colca Canyon isch überne 5000 m.ü.M. höche Pass gange u het üs dür sehr schöni Landschafte u Bärge gfüehrt. Im Städli acho, simer de chli übere lokau Märit gschlenderet u hei no paar chlini Suvenirs gängelet. Am Abe simer zude hot springs usegfahre, chli ga usspanne u zwarme Wasser gniesse. Am zwöite Tag im Colca Canyon simer mitem Bus am morge früech witer ids Tau inegfahre, womer de bire Ussichtsplattform uf die usflügende Condore gwartet hei. U uf ds Mau si sie i ihrer imposante Grössi u mit auem Stouz unger üs dür ds Tau gleitet. Bis am Mittag hei mir de no e chline Hike dür ds Tau gmacht u am Nami, womer zrug im Dorf si gsi, het üsi Travelgruppe no gäge die iheimische Kids gschuttet. Am Abe si mir imne typisch peruanische Restaurant mit peruanischer Livemusig u Tanz ga ässe. Im irische Pub hei mir du de nähr der Abe la usklinge, bevors am nächschte Morge via Arequipa witer uf Nasca isch gange.
Nasca
Nasca isch es ziemlech stoubigs u verlornigs Kaff im Niemandsland, wome nur häregeit um die vode Inca gmachte u berüehmte „Nasca Lines" zgseh. Die hei mir üs natürlech de nid la entga u si mitemne chline Flügerli ds viert über die berüehmte Linie u Figure gfloge. Der Flug isch zwar nume 30 Minute gange, aber es het glängt, um üs es liecht sturms u gwagligs Gfüuh zverleihe. dLinie an sich si no imposant, sonfernmese o fingt u klar gseht. Aber üs isches doch immer no chli es Rätsu wie die Linie so gnau dert häre si cho. Es Gheimnis, wo dIncas guet bewahrt hei. In Nasca hei mir aber o es zimlech cuuls Hotel gha mitemne gmüetleche Pool, womer am Nami de dSunne no chli gnosse hei. Am Abe het es „Pachamanca" uf üs gwartet. Ds isch es traditionells Barbecue, wo sie in Peru mache u aues Ässe imne Loch im Bode vergrabe u mit heisse Steine zuedecke, dermit aues schön gar wird. Gschmöckt hets an und für sich no fein. Aber der Guu vom Ässe im Mu, isch nid sehr beruschend gsi. Trotzdäm heimers gärn mau probiert.
Ica / Paracas
Am nächschte Morge si mir mitem Bus richtig Ica gfahre, wo mir ire Vinery e Füehrig u Degustation gha hei. Dert mache si näbscht Wii der für Peru berüehmt Pisco. Mir hei ca. füf verschiedeni Piscos degustiert u ono diversi Konfis u Schoggi. I dSchoggi hei mir üs de ziemlech verliebt u grad es paar poschtet. Uf der Tur dür dVinery hei mir glert, wases aues für Prozässe brucht, bis der Pisco so fertig isch. Nach guet emne Stündli simer de witer gfahre uf Paracas, wo mir nume einisch übernachtet hei. Bim gmüetleche zMorge am Strandwäg vo Paracas hei mir zuegluegt wie dPelicane mit riesige Fische gfuetteret si worde, dermit jede Turischt sis perfekte Erinnerigsföteli mit de Pelicane het chöne schiesse.
Lima
Vo Paracas us heimer der Bus uf Lima gno u ds isch mau e richtige Publicbus gsi. Ar Busstation isches wiud zue und här gange u mir hei guet zu üsne Rucksäck müesse ufpasse. I däm wiude Hin u Här isches gar nid so eifach gsi der richtig Bus zverwütsche. Aber üse Guide het ds souverän organisiert u dirigiert. Gäge Abe, wo mir zLima acho si, hei mir üs vo eim vo üsne lang mitreisende Gspändli müesse verabschiede. Der Pete, wo sit Rio mit üs ungerwägs isch gsi, het a däm Abe e Flug richtig Quito gha. Machs guet Sneaky Pete. Mitem Räscht vor Gruppe simer zum Abschluss vo dere Tour vomne äutere Herr i sis Restaurant zum Ässe iglade worde. Komischerwis hei mir nachem Ässe aber glich e Rächnig becho… so louft ds haut ds Peru. Am zwöite Tag in Lima si mir ar Küschte na zur Mall glofe u hei chli i de Läde umegschnöiget u es Käffeli gno mit Ussicht ufe Pazifik. Speter simer richtig Plaza Major glofe, wo mir üs im für Lima bekannte Schwizer Restaurant ändlech mau wieder e Röschti und e Bratwurscht hei göhnt. Ds het würklech guet ta. Gäge Abe hei mir üs de mit de neue Gspändli für die letschdi Etappe vo üsere 3-monatige Südamerikareis troffe. Ganz nach üsem Gusto isch ds wieder mau e chlini Gruppe gsi mit nume siebe Lüt u eim Guide. Ds erschte Diner mit dere Gruppe isch de o ganz e cuuli Sach gsi. Im Quartier vo üsem Hotel hei paar Iheimischi, wie jede Sunntig, typisch peruanischi Gricht kochet, wos sehr früsch, sehr fein u sehr günschtig gä het. Am letschde Tag in Lima simer aui zäme ids „Mueso Largo", wome aues über dIncas u ihri Vorkultur het chöne lere. Aber o süsch viu interessants über angeri Urvöuker vo Südamerika. Am Abe het de der nächscht Nachtbus uf üs gwartet, wo üs nach Huanchaco het gfüehrt.
Huanchaco
Huanchaco liegt am Pazifik u isch bekannt für gueti Surfwäue. zTini het de mit paar angerne vor Gruppe e Surflektion gnosse u erschti Moves ufem Surfbrätt probiert. zMeli het derwile dBeach mitemne Spaziergang uskundschaftet u de Fischer bim Angle zuegluegt. Am nächschte Morge heimer de mau chli ar Beach chillet derwile die angere vor Gruppe e witeri Incaruine si ga aluege. Nachemne kurze Lunch heimer mit der Guidin no die zwöit äuteschti Chiuche vor Peru, wo ufem Hügu i däm Dorf steit, bsuecht. Am Abe heimer ds chline Surfparadis de oscho ume verlah u si mitemne Nachtbus richtig Mancora witer gange…
Mancora
…ds Mancore het u het eifach nid wöue cho. Es het üs ja scho chli komisch dünkt, ds der Bus zmittsd ir Nacht eifach ahautet aus ob mir Lüt würde uflade oder gar iparke. Zwar het üsi Guidin no öpis vomne Streik glaferet, aber im Haubschlaf hei mir no nid so ganz realisiert, ds üse Bus würklech isch blibe stah. Ersch wo mir am Morge um die siebnä vo bissende Muggestiche erwachet si, hei mir erschrocke müesse feschtsteue, ds mir mau wieder imne Streik glandet si. Mir si zmittsd im Niemandsland ir brändige Sunne ire Kolone vo Buse u Laschtwäge gstande. Wie mir de speter verno hei, hets witervore uf dere wichtige Panamericana-Strass e Strasseblockade gha, wo die Iheimische ufboue hei, wüu sie mitem Pris für ds Riis nid iverstande si gsi. Mit däm läne Stou, wos nähr gä het, hei sie Ufsehe erregt im Land u mit der Regierig übere Riispris chöne verhandle. Irgendwen am Nami um die vierä si sie sech de einig worde u dStrasseblockade isch nadisna ufglöst worde. Für üs het ds bedütet ds mir 13 Stund dert im Bus usghart hei u vor eher arme Bevöukerig im chline Dörfli dert zumne extreeeem günschtige Pris bechochet si worde. Sie hei zum Teil sogar ihri Hüehner afa schlachte u i Topf gheit. Paradoxerwis hets de Riis zum Chicken gä. Da eine vo üsne Gspändli plagiert het, är näm sich itz de e Esu u göng mit däm witer, hei mir Froue es natürlech nid chöne la si, wo mir bir Suechi nachemne Lädeli für öpis zTrinke per Zuefau e Esu gseh hei, dä mitznä u ihm zbringe. Ja, da heter de nid schlächt gstunet u mir angere hei zgröschte Goudi gha. dKids vo däm Därfli hei ihn aber natürlech nid mit ihrem Esu la dervo rite, sondern hei im zeigt, wo är ihn i Stau cha bringe. Nachdäm dStrass am früechere Abe äbe ume frei isch gsi, simer de nach 24 Stund ändlech i däm Mancora acho u nachemne schnäue Znacht ziemlech müed ipfuset. Wägem Streik isch üs de nume no 1 Tag in Mancora blibe, wo mir zersch chli ar härzige Beach u speter ir Beachbar vom Hotel verbracht hei. Am Abe hei mir die geng no warme Temperature bi paar chüehle Drinks ar Beach gnosse, bevors am nächschte Tag richtig Ecuador isch gange.
Üses Fazit zu Peru
Peru bietet landschaftlech ziemlech aues…vo Bärge, über Wüeschti bis zu Beachs eifach aues. Es git aber o paar schöni grossi Städt u überau trifftme immer wieder uf die faszinierende Spure vode Incas. U bis am Schluss isch der Inca Trail zu Machu Picchu üses grosse Südamerika Highlight blibe!
- comments