Profile
Blog
Photos
Videos
Start Peru
Titicacasee
Nachdäm mir üse letschd Blog gschribe hei, si mir dervo usgange ases üse letschd Tag in La Paz wird si. Leider hei aber die liebe Bolivianer gfunde, sie chönte ihre Streik no umne Tag verlängere. Ds het für üs bedütet, ds mir ersch am Mittwuch morge anstatt am Dsieschtig vo La Paz furt hei chöne. U o das het nid ohni Komplikatione wöue klappe. Mir si aui früech ufgstande u no haub verschlafe am haubi 6i ir Loby gstande. dAbfahrt wär uf die 6i planet gsi, aber da der Bus anschinend mau wieder kaputt isch gsi, simer du ersch gäge die 7ä abgfahre. I dere Stund hei mir aui biberet, ob mir de überhoupt no us La Paz use chöme a däm morge, wüu ab de 8ä dStrasse wägem Streik wieder gsperrt wäre gsi. Ei Kurve speter hei mir no drü Israeline müesse uflade, wo o zum Titicacasee hei wöue. Bim Istiege i Bus het die einti vo dene afa umemöge u gräne u mir hei sie nume verdutzt agluegt. Insgeheim hei mir ghofft die macht itz nid no derart e Szene, ds mir glich nid pünktlech us der Stadt chöme. Sie het e Szene gmacht, aber dTourguidin hetse ziemlech küuh abserviert u zuzm schwiege bracht. Im Verlouf vom Tag hei mir du de erfahre, ds sie so dumm het ta, wüu sie imne Bus mit Europäer het müesse mitfahre. Ja, ds macht Israel nid grad viu sympathischer aueses üs scho isch.
Nach de erschte paar Stund Fahrt si mir du de am Titicacasee acho u üses Bösli isch ufnes Boot verfrachtet worde u o mir hei ds Bootli uf die angeri Site vom See gno. Nähr hei mir zum erschte Mau die schöni Gägend rund ume Titicacasee chöne gniesse während üsere Fahrt ids Dörfli Copacabana. Dert heimer de am Ufer vom See no chli dSunne gnosse, bevor mir mitemne chli luxuriösere Bus witer richtig Gränze zu Peru gfahre si. So schnäu wie dGränze zwüsche Bolivie u Peru hei mir no fasch nie 2 Stämple i Pass becho. Ds isch würklech ruck-zuck gange.
Da mir mit eim Tag Verspätig ungerwägs si gsi, si mir du de diräkt zu üsem Homestay bire Familie am Titicacasee gange anstatt zersch no e Tag in Puno zverbringe. Der Wäg zum ziemlech abglägene Dörfli, wo mir üse Homestay hei gha, isch aber nid so eifach zfinde gsi resp. Der Fahrer u üse Guide hei sich bim Name vom Dörfli fautsch verstande. Drum hei mir du de no chli witer müesse fahre aus mir agno hei. Chum acho si mir mit Drummu- u Flötekläng begrüesst worde u vo jeder Familie het scho öper gwartet für üs i Empfang znä. So viu Ufmerksamkeit isch üs scho fasch chli unagnähm gsi. Nachdäm mir üses dahei becho u Sack u Pack abgleit hei, simer zum Fuessbauplatzvom Dörfli ghuschet, wo mir i die traditionelli Tracht vode Bewohner gsteckt si worde. Die Kleider si erstunlech warm, we nid so gar heiss gsi. Aber uf über 3000 müM hetme ds am Abe guet möge verlide. dBewohner hei üs de i dKunscht vo ihrer Musig u ihrne Tänz igfüehrt u mir heis zimlech luschtig gha. Nach dere Empfangsparty simer aui i üsi Familie zrug, wo dMüetter scho eis feins Znacht vorbereitet hei gha. Es het mega feini Quineasuppe u nähr no Härdöpfu-/Rüebligmües mit ändlech mau wieder guet gsauznigem Riis gä. Nachemne Tassli Coca-Tee für üsi Mägeli simer de völlig erschöpft vo däm länge Tag u au dene Idrück am haubi 9i ipfuset. Am nächschte Morge hei mir um die 7ä zum zMorge söue, ds het de e Schlafzit vo 10.5h ergä. Aber wie mir erfahre hei, sie mir fasch aui mehrmaus während der Nacht ufgwachet resp. scho vor de 12ä mau u hei zGfüuh gha mir heige scho Stunde gschlafe. dLuft isch äuä würklech guet u erhousam uf dere Höchi. Bim zMorge mit de fritierte Brötli umne Tassli Tee isch de näbem Meli eis vode früsch gfangnige Fischli am Bode no chli uf u ab gumpet. dKuchi isch übrigens ganz eifach igrichtet… es offnigs Füür, paar Töpf u es Bänkli. Nachem zMorge simer mit üsere Homestay-Mum abe zum Hafe glofe, wo mir mitem Schiff de richtig Taquile Island tuckerlet si. Es isch grad richtig gmüetlech gsi ir Morgesunne chli übere See zfahre u näh ruf der Insle chli umezloufe. Gäge Mittag hei mir de bim höschte Punkt vor Insle Lunch gno, wo mir der füre Titicacasee bekannt Trout-Fisch probiert hei. Ussert dsme mite fine Grätli chli het müesse ufpasse, isch ds ganz e schmackhafte Fisch gsi. Nachem Mittag simer de wieder zum Bootli abeglofe u si richtig „Isla dos Uros" gfahre. dFahrt isch mit 3h ziemlech läng gsi. dBewohner vo dene schwümmende Inslä hei üs de scho erwartet u härzlech begrüsst. Sie hei üs mitemne Theaterspiu zeigt, wie sie läbe u nähr hei mir ono ihri Hüsli dörfe bestune. Sie läbe sehr im Einklang mit der Natur, so hei sie doch pro 3 Familie eis Solarpanel, wo ihne Strom git. Nachere kurze Fahrt mit ihrem gmüetleche u us Schiuff bounige Wassertaxi simer du de wieder uf üses Motorboot gstiege u richtig Puno gange. Dert hei mir nume ei Nacht verbracht, bevor mir am nächschte Morge richtig Cusco los gfahre si.
Cusco
dBusfahrt nach Cusco het 7h duret, aber es si wie gfüuhti 24h gsi. Ds isch würklech e extrem müehsami Busfahrt gsi. Irgendwie hetme nid bequem chöne hocke u o süsch het a däm Tag eifach nüt wöue zämepasse i däm Bus. Drum si mir du de aui chli duselig in Cusco acho u hei nachdäm mir ds Hotel bezoge hei, nume no öpis wöue ga ässe u nähr scho gli mau ungere. Aber wie's so isch, chunts ja de gärn aube angers ausme dänkt u mir si a däm Abe sogar no i Usgang. A däm Abe hei mir übrigens ono dInfo zum Incatrail gha. Der Guide het üs sehr aschoulech u ehrlech verzeut, was üs uf dere 4-tägige Wanderig zu Machu Picchu wird erwarte. Mit dere Info isch üs zwar einiges chli klarer u verständlecher worde, aber mir hei geng no e zimlech grosse Respäkt vor däm Hike.
Am zwöite Tag in Cusco simer ds bekannte Golden Museum (Quoricancha) ga bsueche, womer Teile vode Incatämple hei chöne bestune. Am Nami simer de no ids Choco Museo, wie ds für Schwizer fasch Pflicht isch. Dert heimer de o grad schwarz uf wiis erfahre, ds mir am meischte Schoggi ässe uf dere Wäut u zwar 12kg pro Person pro Jahr. Über 50% vode Kakaobohne vo Südamerika wärde i dSchwiz exportiert. Nachmene kurze Spaziergang dür ds Städtli hei mir üs de oscho wieder mit üsere Gruppe troffe für zäme ga Znacht zässe.
Hüt morge hei mir itz üsi 4kg Gepäck parat gmacht, wo üs de ufem Incatrail vomne Träger jewius zude Schlafplätz treit wird. Mir wärde gli nach Ollantaytambo fahre u dert morn am Morge der Incatrail i Agriff nä. Mir hoffe, ds mir da Hike u die 3 Nächt duse im Zäut guet überstöh u heil u zfriede in Machu Picchu achöme nächscht Donnschtig.
Bis gli!
- comments
Theo Hallo Martina mit grossem Interesse lesen wir jeweils Deine Berichte. Die sind einfach Spitze! Wir hoffen dass ihr auf dem Incatrail wieder viele unvergessliche Eindrücke erleben werdet. Geniesst es in vollen Zügen. Viele Grüsse von der Kappeler-Crew und Anhang.
Peter Ciao zämä Wow, ich freue mich jeweils über die tollen Reiseberichte und Föteli aus Südamerika. Ich wurde in Interlaken herzlich empfangen und bin bereits gut ausgelastet.... Im Zusammenhang mit der Neuorganisation suchen wir im Bereich der Kreditassistenz eine Verstärkung (allenfalls befristet auf 3-4 Monate). Falls du (Melanie) nach deiner Rückkehr noch kein Engagement eingegangen bist, könnten wir allenfalls bei Gelegenheit via e-Mail austauschen? Ae gueti Zyt und häbid Sorg! Peter