Profile
Blog
Photos
Videos
Bolivie - der berüehmt Salar de Uyuni u 3 ungerschiedlechi Städli!
1. Tag Salar de Uyuni
Dr letscht Morge in Chile isch prägt gsi mit Warte! Zersch hei Turtel Twins ä Verspätig vo ganze 2 Minute gha :-) Nachdäm mir i de letschtä Täg immer uf üsi Gruppegspändli hei dörfe warte, hei mir z Gfüu gha mir pressiere nid und siehe da, es het ä Zämeschiss gä, wüume wäge üs de am Zoll sicher länger müessi warte...
Nach 3 Minute Autofahre si mir scho bim chilenische Zoll acho, wo sie üs gseit hei dä sig wägem Schee uf dr bolivianische Site no gschlosse. U so hei mir scho mau 2 Stung ir Morgecheuti chöne warte... Nachdäm mir de ändlech dr Usgangsstämpu vo Chile im Pass gha hei, hei mir zur Ufwermig es Käfeli wöuä ga nä! Die hei aber üsi Bstellig gekonnt zwöi mau vergässä u so hei mir nach 3/4 Stung no geng kes Kafi gha. Da hets üsem Guide dr Nugge doch no usegjaggt u mir si gange...
Nach nomau eire Stung warte bim Auto hei mir üs schlussendlech doch no ufe Wäg zum bolivianisch Zoll gmacht! Z'Abentür Bolivie cha afa!
Obwou aui gseit hei, es göng de lang bis mir dr bolivianisch Stämpu im Pass heige, hei mir ohni Problem chöne ireise! Im Gägeteil, so schnäu wie ds Bolivie hei mir no chum e Gränze passiert.
Chum hei sech aui vorem Auto versammlet für das mir uf die zwöi 4-wheels-drive Auto chöi umsattle, chunt die nächschti Verzögerig! Eine vo üsne Jeeps het es mechanischs Problem u so hei mir müesse warte bis ä angere Jeep chunt, wo üs cha mitnä! So hets du de gheisse mir müesse zudäm dä eint Jeep abschleppe, wüu das Auto irgendwie het müesse gflickt wärde!
Mit dene "chlinere" Verzögerige hei mir üs ufe Wäg gmacht für die fantastischi Landschaft uszkundschafte! Nachdäm mir die wiisi Lagune hingerüs hei gla, si mir zur grüene Lagune cho! Ufgrund vom Vulkan, wo hinger der Lagune isch, si d Mineralie im Wasser grüen und je nach Aktivität vom Vulkan isch dFarb drum intensiver oder weniger! U wes windet si dFarbe ono mau intensiver.
Nach der grüene Lagune isches witer zum Lunch. Dr eiget Choch het es super feins z'Mittag gmacht mit feine Nüdeli, fasch wie deheim! Bim Lunch-Break hät mä oh no bi de Termas de Polques it Hot Springs chöne ga bädälä. Aber da mir leider chli chauti u windegi Täg hei verwütscht, hei mir das la si. Jaaa z'Wasser wär warm gsi, aber mä het sech unger freiem Himmu müesse umzieh u das isch scho grad chli brrrrr gsi! A däm Stop hets no e chline Kiosk gha u mir hei ändlech mau wieder es Güetzi wöue u drum het ds Meli kurzerhand 2 Päckli Güetzi packt u der Pris vo dene mitem Gringo-Charm no chli abegmärtet.
Die nächschte paar Stung hei mir de no die ungerschiedlechschtä Foto-Sujet bsuecht unger angerem ono die nach schwäfu-stinkende Geissire.
Die ganzi Fahrt isch immer wieder chli ungerbroche worde, wüu sech zAbschleppseili, wo meh ä Isestange isch gsi, vom Auto glöst het. Aber d Fahrer hei das immer cool wieder agmacht u d Reis isch witers gange! Währender ganze Fahrt hei mir übrigens ganz cuuli Musig gha. Es isch irgend e Mix gsi vo äutere Pop Songs. Ja, mir hei einisch meh müesse feststeue, ds mir zur äutere Garde i üsere Gruppe ghöre, wüu de 20-jährige i üsere Gruppe hei die Songs nid so viu gseit wie üs äutere Hase.
Nachem Idunkle si mir schlussendlech zu üsem erschte Camp cho. Es isch es spärlechs igrichtets Huus mit kere Duschi gsi und es isch *pips* chaut gsi! Aber mir hei üs gseit: „Da müesse mir itz düre!" Dert isch de o dr chli Tiger-Jimmy gsi, dr chli Giu vom Fahrer. Ohni grossi Hemmige isch är itz Zimmer ine cho u het sech z Haarbändeli vom Meli und d'Wasserfläschä vom Tini gschnappt. "Para mi" u scho isch die Fläsche im Mu gsi... Ja guet de nimmsch sä haut! Leider hei mir kes Föteli dörfe mache. Dr Guide het üs bäte keni Fotos z mache, we sie das nid wei u dr chli Tiger-Jimmy het kes Foti wöuä :-/
Nachemene guete z Nacht si mir de erschöpft i üsi Schlafsäck u unger Decki gschlüpft. Die Nacht isch sou chaut gsi! Aber mir hei sä meh oder weniger überstande... mau abgseh vom Meli, wo ide früeche Morgestunde zerscht Mau via Mage-/Darm zgspühre het becho, ds sie dHöchi äuä nid so mah verlide. Ja, es het de die nächschte Tage ono grad nid besser wöue wärde u sie isch ziemlech lisli u stiu worde…
2. Tag Salar de Uyuni
Nach dere chaute Nacht u nachemene churze z'Morgeässe si mir it Autos igstiege und zur rote Laguna gfahre. Dert isches biiiiisig chaut gsi, drum si mir nachemene churze Stopp und ämänä Autowächsu sofort witers! Mir hei es bis itz aus ganz u nid kaput gäutends Auto la stah u si mitem angäblech kapute Auto witergfahre, wo d Fahrer währendere Nachtschicht wieder einigermasse fahrbar gmacht hei! Ab itz hei mir aui paar Kilometer ä Stopp chöne mache für bim Auto wieder Wasser ufzfüue oder dRedli wieder chli azstrube... Ja, ds isch Bolivie! Was nid louft, wird geduldig wieder zum Loufe bracht. :-)
Dr ganz Tag hei mir de no ungerschiedlechi Lagune und Ussichtspünkt bsuecht. Da leider dSauzwüeschti vom Rege, wo vor es paar Wuche isch gsi, no überschwemmt isch gsi, hei mir nid itz Salzhotel chöne ga übernachte. Aus Ersatz si mir de ine eifachi Ungerkunft chli usserhaub vo Wüeschti. Mir hei aber ke Ahnig, wo mir gnau gsi si u wie ds Dörfli mit däm Hotel gheisse het.
3. Tag Salar de Uyuni
Am dritte Tag vo üsere Tour übere Salar de Uyuni hei mir üs am morge wieder ufe Wäg gmacht für witeri Landschaftsteile vom Salar de Uyuni zbestune. So si mir aus erschts zumene Train Cemetery gfahre, wo die aute verroschtete Züg beärdiget si.
Nach däm Bsuech bim Zug-Friedhof hei mir üs scho chli gfröit, dass mir es Auto bechömä, wo mir nid wieder müesse Angscht ha, dass es jetz de grad abliegt! Wüu währendäm mir auti u usdienti Züg gfötelet hei, si üsi Guides mau wieder ds Outo ga wächsle. Nachdäm mir aber 10 Minute si gfahre, hets plötzlech ghöuperlet u ds neue Auto het ä Platte gha! So langsam hets gloub üse Fahrer de o nüm luschtig gfunde! Aber was het er wöue? Füf Minute später isch ds Rad gwächslet gsi u es isch scho wieder witergange mit dr Hoffnig, dass dieses Mau aues häbt!
So hei mir mitemene neue Reife dSalt Flat überquert u si zur Isla de Pescadores ga Lunch ha! Dert hei mir de o gnue Ziit gha die ungerschiedlechschte Föteli mit der wiise Wiiti vor Säuzwüeschti im Hingergrund zschiesse.
Gägä Abe si mir de langsam froh gsi, dass mir wieder mau imene schöne Hotel hei chöne übernachte u z Privileg vore warme Duschi hei chöne gniesse! Am Abe isch z'Tini mit dr Gruppe ga Pizza ässe u ines Pub. Z'Meli het leider wäg ihrer Mage-/Darmverstimmig nid chöne mitcho u lieber no ds Bett im Hotel ghüetet.
Das si üsi Erkundschaftige u Erläbnis vom Salar de Uyuni gsi!
Potosi
Vo Uyuni si mir mitemne private Bus währendere 5-stündige Fahrt uf Potosi grasslet. dStrass isch am Afang extrem houperig u sandig gsi. Nähr isch sie du geng wie besser worde u am Schluss richtig guet terret gsi. Im Hotel acho het üse Guide kurz informiert, wases ds Potosi so zungernä git u dHouptattraktion wär e Bsuech ir Miene gsi. Da mir zwöi aber scho mau e Doku über die Miene u die schlimme Arbeitsbedingige vode Minöre im TV gseh hei, hei mir üs entschiede dä Usflug usezlah. Mir hei i däm Hotel ds bärner Päärli wieder troffe u sie anstatt i dMiene mit ihne ds Städtli ga uskundschafte. Uf däm Spaziergang isch üs mehrmaus dLuft usgange… entweder, wüu mir wäge der Höchi so hei müesse schnufe oder wüu es Outo wieder extrem viu Abgas ghueschtet het. dLuft isch nid die Beschti in Potosi, aber es het e härzegi Fuessgängerzone. U mir hei o festgsteut, ds Bolivie gar nid so chaotisch u unstrukturiert isch, wieme meint, wüu jedes Handwärk het sini Strass i dere Stadt. So gits e Strass nume mit Coifföre u eini nume mit Handwärkerlädeli, etc.
Am Abe simer nachem Znacht no ine Bar mit Karaoke gange. Üse Guide u dJungs vo üsere Reisegruppe hei de ihri Stimmwunder mau zum Beschte gä. Und scho wieder hei mir e Station meh uf üsem Travel Plan chöne abhägle.
Sucre
Am erschte Tag in Sucre hei mir üs la orientierte, was mir ir Umgäbig aues chönte ungernä u hei üs fürne Hike am nächschte Tag entschiede. Dä het am 9i am Morge mitere Fahrt use uf dHügle vo Sucre gstartet. Mir si uf 3900 müM ufe gange u hei dert üse Hike gstartet. Zersch hei mir dÄbeni vo Sucre gseh. Es git verschiedeni Theorie, was die Landschaft chönt bedüte resp. wie sie zstand isch cho. Es chönt si, ds zMeer die Steine so gformet het oder der Wind oder o der Ifluss vomne Vulkan die Äbeni so speziell gmacht het… oder mi seit o es chönte dFingerabdrück vo Gott si. Nachdäm mir ca. e Stund ufe u abe gwanderet si, simer bide imposante Wandmalereie vo irgendemne Urvouk vo Südamerika (mi weiss nid gnau vo welem Vouk die Malereie stamme) acho. dKreisli ar Wand hei aber meh usgseh wienes belangloses Kritzu u si nid würklech sehenswärt gsi. Die zwöite Malereie, womer nachemne kurze Abstieg erreicht hei, si da scho chli idrucksvouer gsi. Aber eigentlech chame o die mitemne guete Gwüsse ufem Travelplan uselah. Der Hike het üs de no über ei Hoger gfüehrt, bevor mir via Hängebrügg ds Flüssli überquert hei u mitem Bus wieder 3h nach Sucre zrug ghöuperlet si. dFahrt isch ziemlech amüsant u abentürlech gsi, hei mir doch paar Flüssli u ängi Passage müesse dürquere.
Am nächschte Tag si mir zum Ussichtspunkt vom Städtli ids Quartier „La Recoleta" ufeglofe. dUssich über ds Städli isch vo dert obe würklech der Hammer gsi. Wüus üs so guet gfaue het, heimer de mitem bärner Päärli kurzerhand grad e kurzi Fotosession mit spezieue Pose vor dere Kulisse igleit. Ufem chline Märit näbem Ussichtspunkt hei mir de no paar Lama-Souvenirs gängelet bevor mir am Abe mit üsere Klike si ga häberle. Nähr si mir no fürne Drink i die nächschti Bar u da mir's so luschtig hei gha, heimer am 12i no nid hei wöue u si i die einzigi Disco, wo offe het gha a däm Donnschtigabe. Es isch meh e grosse Ruum mit Bar gsi u het ame Jugendträff bi üs dahei gliche. Aber mir heis glich ziemlech luschtig gha mit üsne Gspändli.
Am letschde Tag in Sucre hei mir de bimne Picnic im Parco Bolivar no chli dSunne gnosse. Da üs ds aber mit der Zit chli zlängwilig isch worde, si mir zwoe fürnes chlises Apero nomau zum Ussichtspunkt ufe gschuenet u hei üs es Gläsli Wiise mit feine Bruschetta göhnt u dUssicht uf dStadt gnosse. Am Abe isch üs de der nächscht Nachtbus bevorgstange u vor däm hei üs immer aui chli Angscht gmacht. Der Bus sig de nid suber, ds WC göngi nid, mi bechöm keni Dechine u dFahrt duri de sicher länger aus agseit, wüus Strassesperrine oder Streiks gäbi. Kurz gseit, es erwarti üs de scho chli a schlächtere Nachtbus aus mir ds vo Argentinie u Chile gwöhnt sigi. Zu üser Überraschig isches du aber eine vode beschte Nachtbuse überhoupt worde, wo mir i de letschde 7 Wuche gha hei. Ds WC isch glofe, dSitze si extrem breit u bequem gsi u dStrass isch überhoupt nid gsperrt oder schlächt zwäg gsi. So hei mir fasch die ganzi Fahrt düre pfuset u die 12h si wie im Nu vergange.
La Paz
Am Morge am 7i si mir am Busbahnhof vo La Paz acho u üse Guide, der John isch bereits nach 5 Minute völlig ufglöst düre Bahnhof gsecklet u het Taxis gsuecht, wüu üses Bösli, wo üs für zum Hotel hät söue cho abhole niene uffindbar isch gsi. Ds Tini het no nid mau ihre Rucksack vom Bus usglade gha, scho isch är wienes Beieli umeghüschteret u derbi isch är däjenig gsi, wo üs gseit het mir söue de ds Bolivie i auem chli geduldiger si aus süsch. So si mir du mit Taxis zum Hotel u si sehr dankbar gsi, ds üsi Zimmer zum ichecke bereits parat si gsi u mir no e Nap hei chöne ga nä. Am Nami heimer dUmgäbig rund um ds Hotel chli uskundschaftet u üs ändlech e Alpacapulli kouft. Sie säge emu es sig reini Alpcawulle, aber ds gloube mir scho lang nüm, wüu ds Bolivie verchouft würklech jede nume reini u „tüüri" Alpacapullis. Am Sunntig hei mir du de mau chli usgschlafe u am Nami simer bim höchschte Punkt vor Stadt uf rund 4000 müM ga Wrestling luege. Es isch einersits ziemlech amüsant u angersits o chli brutau u doof gsi zum luege. Aber es isch e Erfahrig meh. Nachem Znacht hei mir üs de vom einte Gspändli u üsem Guide müesse verabschiede, wüu in La Paz e Guidewächsu stattfindet. Zudäm wärde mir acht neue Gspändli i üsi Gruppe becho für dWiterreis nach Peru. Mir si gspannt, wär mir aues nöis wärde lere kenne. Der letschd Tag in Bolivie hei mir no chli mit Sightseeing im wäge de Transportstreiks verchersfreie La Paz verbracht u no ds einte oder angere Souvenir poschtet.
Fazit
Bolivie isch für üs bis itz eis vode landschaftlech schönschte Länder in Südamerika u ds Ässe u dHygiene (Houz alänge) isch nid soooo schlächt wie aui immer säge.
Adios Bolivia!
- comments
Alex Schenkel Super spannendi Brichte, spannend zum Läse wi weme säuber drbi wär.Machet so wiiter und gniessets wiiterhin. Olé
Patricia Mettler Hey ihr erelbet do jo einiges und es isch würklich interessant zum eui Erlebnis z'läsä au wenn s'Berndütsch äs bizäli schwierig isch. Bi scho gspannt was ihr no meh erlebeä werdet. Olé