Profile
Blog
Photos
Videos
Chile… Puerto Varas, Pucon, Santiago de Chile, La Serena und San Pedro de Atacama!
Don't cry for Argentina… Chile het sicher o si Reiz!
Vo Bariloche us het üs e witeri Busfahrt nach Perto Varas in Chile erwartet. D'Fahrt het üs dür die schöni Landschaft vo Argentinie und Chile gführt. Mir hei Wüeschti-ähnlechs Gebiet, aber o grüeni Regione mit See u Feuslandschafte gseh.
Zollbestimmige für d Ireis nach Chile si ziemlech sträng, drum hei mir bim Zoll aui Täschä müessä uslade u vom Spürhung la beschnuppere. Es isch strikt ungerseit gsi irgendwelchi Läbensmittu wie Frücht u Gmües oder tierischi Produkt izfüehrä. Glücklecherwiis hei mir aber aui ke verboteni Ware i üsem Gepäck gha u mir hei nach längerem Warte u mitemne witere Stämpu i üsem Pass nach Chile chöne ireise.
Wo mir in Puerto Varas acho si, isch ds Wätter rägnerisch u chaut gsi, drum hei mir kurzum üses Hotel bezoge u hei der Nami imne gmüetleche Kaffi verbracht, wo mir üs bimne warme Tassli Tee hei chöne ufwärme. In Puerto Varas chöntme im Summer die nördleche u südleche Pinguine zäme beobachte, da aber der Apriu in Puerto Varas scho zum Herbscht zeut, si die Pinguine aui scho ume gange u drum hei mir in Puerto Varas keni grosse Aktivitäte planet gha. Em Rägewätter zum Trotz hei mir üs du am zwöite Tag i däm chline u ruehige Dörfli aui e stündigi Ganzkörpermassage im benachbarte Hotel göhnt. Es isch würklech Entspannig pur gsi, hei mir doch dWadli vom Hike u Radle in Bariloche no chli gspührt u mit dere Massage der Muskukater chli verdränge.
Am nächschte Morge het üs e kurzi Busfahrt vo ca. 7h uf Pucon gfüehrt. Ds isch es äbefaus chlises chilenisches Dörfli, wo beinahe jede zwöit Hushaut no es Zimmerli vermietet u sich so säuber zum Hostel macht. Mir hei o so es familiärs Hostel bezoge u hei eigentlech dänkt, ds mir de e eigeti Chuchi hei zum bruche u mir üsi Gruppegspändli mitere Bärner Röschti chöi verwöhne. Aber us däm isch de leider nüt worde, wüu mir dChuchi nid hei dörfe bruche.
In Pucon hei mir ei grossi Aktivität vor üs gha. dBezwingig vom Vulkan „Villarrica"! Mir hei a däm Abe lang hin u här diskutiert, ob mir dä Ufstieg uf üs wei nä oder nid u schwizerisch wie mir si, hei mir o chli skeptisch gfragt, ob de ds nid gfährlech sig, wemer über Iis u Schnee bis zum Gipfu vo däm Vulkan müesse ufe hike. Mir hei ja nid ine Gletscherspaute wöue gheie… Aber nach Langem hei mir üs du de entschiede dä Hike am nächschte Tag zungernä. Ds het bedütet, ds mir nachem Znacht vo üsem Tourabieter e ganzi Wanderusrüschtig mit spezieue Kleider, herte Wanderschueh, Stiegise, Heum, Rucksack u warme Kleider hei müesse fasse. Ufem Vulkan hets nämlech teilwis no Schnee u Iis gha, so ds mir mit chaute Temperature hei müesse rächne. Am nächschte Morge i auer Früechi si mir auso de i üsi Odlosache gschlüpft u hei die agsprochni Schutzusrüschtig gsetzt. Nachere stündige Fahrt no dür zFischtere si mir bim Grund vom Vulkan acho u hei füre erscht Bitz aui ds Sässeli gno, wo üs bereits chli witer ufe bracht het. Ds Wätter het a däm morge nämlech nid sooo guet usgseh, so ds üse Guide entschiede het mitem Sässeli chli Zit zgwinne, dermit mir mit schönem Wätter am Gipfu chöi acho. dSässeli isch übrigens nid unbedingt nach SUVA-Norm betriebe worde. Sicherheitsbügle bruchts in Südamerika zum Bispiu nid. Entsprächend gstabig u stif si mir de o uf däm Sässeli ghocket u doch bau froh gsi, wo mir nach dere kurze Fahrt sicher obe si acho. Nähr isches los gange… Schritt für Schritt im Gänsemarsch immer witer ufe. Die erschte Angerhaubstund si mir dür Feuse u Sand ufegstiege u hei bim Schnee acho, zersch mau tou müesse schnufe, bevor mir es verdients Znüni hei gno. Wandere i dene Höchine isch haut doch nomau viu asträngender, wüu dLuft s dünn isch. Nach dere Pouse hei mir dStiegiseli u dStüupe a dFüess montiert u der Guide het üs e Instruktion gä, wie mir uf Iis u Schnee müesse loufe. Faus mir usrütsche, heter gmeint, heigemer füf Sekunde Zit üs mitem Ispicku im Iis feschtzhage…faus mir ds nid schaffi, wärdi mir scho so es höchs Tempo ha, ds e Brämsig äuä nüm müglech sig u mir abrütschi…ds isch e ziemlech klari Asag gsi u entpsrächend gwaglig u no chli schockiert hei mir die erschte Schritt uf däm herte Schnee gno. Mi het sich scho grad hurti chli a ds Gfüuh müesse gwöhne, aber mit jedem Schritt isches besser gange u mit der Zit isch eim ds Loufe uf Schnee u Iis de o agnähmer vorcho aus ds Loufe im Sand vorhär. Mir Schwizer hei ja am Vorabe no Bedänke gha, wäge Gletscherspaute u üse Guide, der John het zu üser Beruehigung gmeint gha, ds sig überhoupt kes Problem, es heig keni so Spaute uf dere Wanderig…umso stränger hei mir de gluegt, womer scho nach nume zäh Minute Loufe uf Iis über die erschti Spaute hei müesse stiege. Aber üse Bärgfüehrer het üs da suverän drüber ghoufe. Die Spaute het üsi Respäkt vor Schwierigkeit vor dere Wanderig aber tou ufrächt erhaute. Nach witere angerhaub Stund hei mir de ds Isfäud passiert gha u hei füre letschd Bitz über dLawasteine u Feuse üsi Stigiseli wieder chöne abzieh. Der letschd Bit zisch würklech no es richtigs Dessert gsi, da dFeuse zum Teil haub so gross wie mir si gsi, isch ds meh es Klättere gsi aus es Wandere. Nach totau 4.5h si mir de ufem „Gipfu" vom Vulkan acho. dUssich, wome vo dert obe het isch würklech sehr toll. Mit schönem Wätter gsehtme über die ganzi Äbeni i u cha die chilenischi Wiiti so richtig gniesse. Mi muess aber zwüschine o dNase chli zue ha. Dä Schwäfurouch vom Vulkan isch nämlech nid ganz ohni. Es stinkt nid nume ziemlech grusig, sondern brönnt o stark im Haus u ir Nase. Drum hei mir du nachemne kurze Lunch o der Rückwäg unger dFüess gno u si der ganz beschwärlech Wäg, womer gäg ufe gha hei ume abe krakslet. Am ringschte isch üs daderbi der Wäg übere Sand gange. Bim Ufe ga heimer no gfluechet, wüu mir immer igsunke u ume chli abegrütscht si, aber umso ringer isch d sitz bim abe ga gange…mi het sich richtig im Sand chöne la isinke u daderbi fasch der Bärg abeschlöfle.
So simer nach 2h zwar ziemlech müed, aber o happy über üsi Hikeleischtig bim Van acho.
Nach der Rückfahrt hei mir a däm Abe keni grosse Sprüng meh gmacht, sondern si ziemlech früeh ungere u hei der Schlaf gnosse bis irgendwenn am nächschte Mittag.
Zur Regeneration hei mir am Tag nachem Hike nume chli usgspannt u si am Abe no zu de Hot Springs gfahre. dFahrt dert häre isch bau wie ufere Achterbahn gsi…ufe u abe u ziemlech kurverich. Aber üse Fahrer, wo mir gha hei, isch nid zum erschte Mau zu dene Hot Springs gfahre, ds hetme gmerkt u glich si mir froh gsi, hei mir chli uf dStrass gseh u i de Kurve chöne ineliege. Ds Hot Springs Areau het um die 5 Wasserbecki gha u mir hei üs vom chaute zum heisse vor gschaffet. Üsne Wadli het ds Schwadere im heisse Wasser ziemlech guet ta. Aber wes no Sprudeli hät gha, wär ds zOptimum gsi.
Üse letscht Tag in Puerto Varas hei mir mit Ichoufe u Packe verbracht, wüu mir am früechere Nami bereits wieder ine Nachtbus si gstiege, wo üs nach Santiago de Chile het bracht. Ufem Wäg zu däm Nachtbus hei mir de o üse Spitzname becho. Da mir beidi so e grosse resp. breite Rucksack hei u mir so chli si, gseht der Rucksack, wemerne trage us wienes Schiudkrotehüsli…drum wärde mir ab däm Tag i üsere G-Adventure Gruppe nume no „dTurtel Twins" gnennt. Es isch e spontane Ifau gsi vo üsem Guide u scho wärde mir dä Übername nüm los.
Nachere lange Nacht im Bus mit chum Schlaf hei mir ghofft, ds mir ds Hotel in Santiago de Chile bi üsere Akunft am früeche morge de bereits chöi bezieh. Leider isch ds nüt worde u sie hei üs versproche Zimmer sige de uf die 9i parat. De si mir haut afe es zMorge ga nä, wo ds Meli u zwöi anger ziemlech grusig u versauze het tüecht. Ds het de dLuune nid grad ghobe. Am 9i simer zrug im Hotel gsi u hei üs scho uf paar Stung Schlaf gfröit, wo sie üs mitteilt hei, ds dZimmer nid vor de 2ä wärde parat si. Kurzerhand si mir du haut nähr e Free Walking City Tour ga mache. Der Guide vo dere City Tour het sehr viu mit de Händ gestikuliert, so ds mir ihm bau nume no hei müesse zueluege u nüm zuelose. Die Tour het üs 3 Stund quer dür Santiago gfüehrt u mir hei es paar interessanti historischi Hingergründ u Gschichte zu dere Stadt verno. Am Nami hei mir du ändlech üses Hotelzimmer bezoge u si aber o grad ume witer ine Bar ga Champions League luege. Am Abe si mir i ds für Usgang berüehmte Quartier „Bellavista". Ussert emne chline Znacht hei mir aber nid viu länger dert möge blibe, wüu mir doch ziemlech tilt si gsi vo däm länge Tag.
Am zwöite Tag in Santiago hei mir du mau chli usgschlafe u üs eigentlech am 12i mit üsere Gruppe fürne Abstächer zum Ussichtspunkt vor Stadt wöue träffe. Wäge diverse Verspätige vo üsne Gspändli si mir du de aber afe am 2i los glofe. Nachere haub Stund loufe zum Bellavistaquartier, wo zBändli zum Ussichtspunkt wär gfahre, hei du die meischte gar nüm ufe möge u sie ume zrug zum Hotel. Es isch auso irgendwie eifach e abrochne u sinnlose Nami gsi. Derfür hei mir de am Abe es mega guets Restaurant gfunde u super fein Znacht gässe.
Nachdäm eher müehsame Tag hei mir üs entschlosse der dritt Tag in Santiago säuber mit Shoppe u Käfele zverbringe. Ds het de o super klappet u mir heis beidi gnosse mau ohni dGruppe ungerwägs zsi. Wüumer am Nami no chli Zit hei gha, heimer üs entschiede glich no mit däm Bähnli zum Ussichtspunkt ufe zfahre u ga zluege wie gross ds Santiago eigentlech isch. Mir hei du o nid schlächt gstunet, womer gseh hei, dsech die Stadt nid grad nume uf üsi paar Quadratkilometer rund um zHotel beschränkt. U oberhaub vom Smog heimer sogar es paar Umrisse vode umliegende Bärge gseh. Es het sich für üs zäme mit der schön warme Sunne auso tou glohnt gha no dert ufe zga.
Am Abe hei mir de scho ume üsi 7 Sache packt, wüu mir am nächschte Morge früeh uf La Serena witer si.
La Serena isch paar Busstund vo Santiago entfernt u es ruehigs Städli, wo dChilene hüfig für paar Tag Ferie am Meer bsueche. Ds hei mir de o gmerkt, wo mir e Velotour ar Küschte entlang gmacht hei u die riese Hotelkomplexe diräkt ar Strass vor Beach gseh hei. Die meischte si aber läär gstande u wärde itz aus Wohnige vermietet oder verkouft. Wie so oft hei mir's nid bire kurze Velotour chöne belah, sondern si bis zum nächschte Dörfli gfahre, wo üs der lokau Fischmarkt i dNase gschosse isch. Ds het üs de weniger gfaue, drum simer nachemne kurze Stop o grad wieder zrug gfresset u hei ungerwägs ersch e Trinkstop igleit, wos ume chli besser gschmöckt het. Irgendwen am speter Nami si mir du de wieder bim Hotel acho u hei üs parat gmacht für i ds Observatory. Um die 6ä si mir vomne Busli abghout worde, wo üs i dPampa usegfahre het. Mittlerwile isches de o schön dunku worde u der Stärnehimmu hetsech meh u meh afa zeige. Im Observatory hei mir e sehr interessant Füehrig becho u viu über dStärnewäut glert. Mir hei zum Bispiu glert wieme Stärne vo Planete cha ungerscheide u nähr hei mir dr Saturn mit sim Ring dür ds Teleskop sogar vo necher chöne beobachte. Nähr hei mir no offni u gschlossni Nuvolas gseh, ds si dWulke, wo dStärne drin gebore wärde. Duse hei mir de no glert, wie mir der Südpol ahand vom Southern Cross chöi bestimme. So wärde mir itz immer dOrientierig finge u e Kompass bi üs ha. Aber am luschtigschte si dFigure vode Inkas am Himmu. Sie orientiere sich ade schwarze/stärnefreie Flächine u nütze dStärne nume aus Umrandig oder Ouge für ihri Figure, wie zum Bispiu bim Lama oder bir Schlange. Mitem Bsuech im Observatory isch o der Bsuech in La Serena zÄnd gange.
Üse nächscht Haut het San Pedro de Atacama gheisse u isch üsi letschdi Station in Chile. Ds isch es sehr chlises, tüürs u sandigs Dörfli nach zur Gränze zu Bolivie. Mir hei dert e Tour ids „Valley oft he Moon" buechet, wo vom spetere Nami bis am Abe duret het. Mir si mitemne Van u amne lokale Guide die imposanti Steiwüeschti a diverse Orte ga bestune. dSteine si aber mehrheitlech no mitere wiise Sauzschicht beleit gsi, wüus grad viu grägnet het gha. Aber dUssicht über au die Stei- u Sandformatione u uf dVulkane vo Bolivie isch sehhr sehenswärt gsi. Wos het afa idunkle si mir du de no zumne spezieue Ussichtspunkt gfahre, wo mir der Sunneungergang gnosse hei. dVulkane uf der Gägesite si im sinkende Sunneliecht aber fasch schöner zum Luege gsi. Uf dere Tour dür zValley of the Moon hei mir es jungs u sympathischs Päärli us Bärn lere kenne u nach der Rückkehr ids Dörfli heimer de no chli mit ihne Glaferet u üsi Reiseerläbnis ustuscht. Es isch schön gsi, mau eifach wieder unbeschwärt Bärndütsch chöne zrede… ds Änglisch geit üs nämlech aumählech chli ufe…
Ds si aui üsi Erläbnis us Chile gsi u mir hei chli es dürzognigs Fazit vo Chile:
Es isch zwar landschaftlech sehr es schöns u eher ruchs Land, aber mitem grosse weschtleche u turistische Ifluss het üs ds südamerikanische Flair chli gfäuht. Mängisch hei mir üs, v.a. i de Städt meh chli wie ds Spanie oder ds Portugal i de Ferie gfüuht.
Hasta luego Chile!
- comments