Profile
Blog
Photos
Videos
Hola Buenos Aires y Bariloche!
Nach derä cracy Überfahrt vo Colonia nach Buenos Aires si mir mitämänä Privatbus zu üsem Hotel gführt worde. Üsi Guidein het üs scho uf das Hotel mental vorbereitet u sie het üs auso nid enttüscht. So si mir i das Zimmer inächo u hei gwüss müessä sägä, dass es riisig isch u dass es no ä schöni Wohnig wär! Oder wie dr Mark sini Gschicht verzeut het, wo z'Heidi (sie het z'Zimmer näbä ihm gha) zerscht mau z'Zimmer gseht het:
I was taking off my trousers for taking a shower and Heidi get in to her room and cried „it's huge! ... Was fürnä luschtigä zuefau ;-)
Nachämänä churzä Snack hei mir z erschte Sightseeing i agriff gno. Buenos Aires isch riisig aber d'Lüt si sehr gmächlech. Vielech ischs aber o dran glägä, dass Oschtere isch gsi u viu nid ir Stadt si blibä. Da mir am Abe am virtu vor Siebni zur Tango-Show wäre abghout worde, hei mir das Sightseeing mitämänä RUN zrügg zum Hotel beendet. Churz düschelet u agleit si mir zumänä Welcom-Drink it Lounge vom Hotel u hei pünktlech ufe Pick-up für d Show gwartet. Wie das so üblech isch het er üs aber mitärä ¾-stündige Verspätig abghout…
Churz nach dr Akunft hei mir aber de scho wieder müessä pressierä für das mir üsi erschti Tango-Lektion nid verpasse. Uno-dos-tres und scho hei mir drü Tango-Schrittä im Griff gha! Vorauem dr zwöit hets in sich gha. So hei d'Jungs numä ihri Arme zwöi mau nach links u rächts müessä wippä, dr wiilä d Frouä vor ihnä hin u her hei müessä Füdälä… U Frouä dänket dra: Tranquilo tranquilo dr Ma führt… Mitemene Diplom i dä Häng hei mir üs am Nachtässä dröfä widmä und d'Tango-Show gniessä!
An nächschtä Morge si mitem Bus richtig „La Boca"-Quartier gfahre! Es isch es farbigs u touristisches Quartier wo z'arme u z'aute Buenos Aires zeigt. Uf dr Strasse hets Märitständ u vor jedem Beizli zeige sie ä Tango-Show. Ä witere Fuessmarsch het üs no zum Stadion vo dä Boca Juniors gführt. Es isch nid z'neuschte u gseht o nid wahnisinig gross us, aber irgendwie passts i die Gägend.
Nachem Bsuech vo diverse angere Quartier in Buenos Aires umene Kaffi ufere Plaza, si mir de am Abe mit viu Idrück vo dere Stadt zu „The Argentine Experience" gange. E ehemalige Tourguide bietet daderbi i sire Wohnig e kulinarischi Reis dür Argentinie a. Agfange hei mir mitem säubergmachte Empanada (gfüuts Teigtäschli) u amne chline Raclettplättli. Der usgflofnig Chäs hetme mit Brot, scharfer Soce ure super Wurscht kombiniert. Nach däm Schmaus isch nähr ds Highlight für dJungs cho… ds beschte Steak vo Argentinie! Es isch würklech butterzart gsi u dJungs si vor luter Fröid fasch high worde. Bim Dessert hei du dFroue ume chli meh fröit gha. Es het Sables gä, wome säuber mit der argentinische Spezialität, am dulce con leche (sone Art viu zsüesses Caramel) gfüut het us nähr no i de Kokosnussspliter gwäuzt u mit Schoggi überzoge het. Für üs zwöi isch ds de fasch chli to much gsi. Dä Abe hei mir de mitere Rundi Jenga-Spiu u amne kurze Bsuech ire Disco beändet.
Am nächsche Morge hei mir üs de vom gröschte Teil vo üsere Gruppe verabschiedet, da ihri Tour zÄnd gange isch. Mir si itz nume no 6 Lüt, wo de zäme witer Richtig Süde gö. Der Nami heimer mit Shoppe ir berüehmte Florida Ave. verbracht. Gshoppet hei mir aber eigentlech nume die fasch usverchoufte Boca Junior Dress. Am Abe hei mir üse nöi Tourguide, der John lere kenne u üsi witeri Reiseroute besproche.
Am Suntig Abe het de e 24stündegi Fahrt im nächschte Nachtbus uf üs gwartet. Mir si vo Buenos Aires quer übere ganz Kontinät grasslet u richtig Süde abe nach Bariloche gange. Mit viu Schlafe, Fiume luege u Läse, si die 24h aber wie im nu vergange. Bariloche het de mit sim Charm üsi schwizer Härz grad sofort packt. Ds Dörfli gseht us wie e Skiort i de schwizer Bärge u a jedem Egge gits e Confiserie mit Schoggispezialitäte. Aber der Schoggi isch nid würklech fein. Der einzig Nachteil, wo mir im Süde itz langsam hei afa gsühre, si die chaute Temperature am Morge und am Abe. Mir hei üsi dicki Jagge itz mau uspackt.
Am erschte Tag in Bariloche si mir mitem Bus i dNatur usegfahre, derbi hei mir die schöne Hüser mit jewius riese Umschwung bewunderet. Kes Hus het normau viereggig usgseh, sondern het paar meh Egge u Kante gha. De si mir 30 min e Bärg ufeglofe (resp. gsecklet) u si dobe acho mitere wahnsinns Ussicht überwäutiget worde. dLanschaft vo Argentinie hetsech i ihrer schönschte Form vor üs usbreitet….viu grüen, Bärge u See. Mir hätte dert stundelang chöne verwile u eifach die Rueh gniesse. Chum hei mir aber e kurze Lunch-Break gha, hei dGuys scho ume witer wöue. Eifach ke Geduld zum Gniesse die Jungs. Kurzerhand hei mir nähr de haut der Rückwäg unger dFüess gno u si die 30 min Ufstieg i 10 min wieder abegsecklet. Luschtigerwis müesse au die G-Adventure-Guides u dJungs i üsere Reisegruppe gäge ufe u abe immer seckle. Womer aber du nähr grad us zum Bikemietshop glofe si, simer fasch igschlafe sones Schnäggetempo hetme agsetzt. Ds isch nid nume uf Hikes eso, sondern o bim Sightseeing ir Stadt.
Der Nami hei mir mitere 4-stündige Biketour rund um die verschiedene See vo Bariloche u Umgäbig verbracht. Es isch e ziemlech hügeligi Landschaft, drum si mir meischtens ufe u de kurzum grad ume chli abe gfresset. Am Afang isch ds Velofahre chli e Chrampf gsi, wüu der argentinisch Fahrstiu chli angers isch aus dä, wo mir üs gwöhnt si. Bi ihne strampletme mehrheitlech i de Chnöi, wüu der Sattu für üsi Verhäutnis viuuuuuuu ztöif unge isch gsi. Ds hei mir aber de korrigiert u nähr isches für üs scho etleches ringer gange. Mir hei aber doch e chli gstunet, ds tiu Gruppegspänli äuä no nid so viu Bikeerfahrig hei gha u zum Bispiu nid mau mit Schuss hei chöne afahre, verschwiege de bim Ufefahre ufzstah u zstrample. O dSchautig isch für die meischte öpis Nöis gsi. Nach 20km radle, het de no ds Dessert vo 8km tafem Rückwäg uf üs gwartet. Nachemne Schluck Gaterade u üsem mittlerwile bissigem Ehrgiz hei mir aber o das no packt u si doch tatsächlech vor de Jungs ume bim Bikemietstand acho. Ds viele Strample isch zwar asträngend gsi, aber mi isch mit extrem schöne Fotosujet u are brachtvoue Natur belohnt worde.
Am letschde Tag in Bariloche het e Usflug zure Pferdefarm uf üs gwartet. Horse Riding isch agseit gsi. =) Bevors aber grad uf ds Ross isch gange, hei mir no e gmüetleche Lunch bir Gaschtgäberfamilie dörfe gniesse. Ds Meli hetsech de dert mitemne Gläsli Rote no chli Muet atrunke. Nachemne super süesse Crêpe mit dulce con leche u Schoggisauce si mir auso de zu dene Baggle hingere glofe. Wüu ds Meli sich grad aus Afänger goutet het, het sie de ds super langsame u scho chli äutere Ross becho. Wie sich aber währedem Ritte usegsteut het, isch am Tini sis no lengsemer gsi. Mir si du während 2h dür dNatur u dWäuder trottlet u derbi fasch igschlafe. Zudäm het mir ds Füdli ja scho vom Vortag vo dene 4h im Bikesattu langsam chli gspührt. Wo de no dSunne abe isch us chaut isch worde, simer gwüss froh gsi, womer ändlech ume bi däm Stau si acho u i die warmi Stube es Tee u es Brownie hei chöne ga gniesse.
Am nächschte Morge früeh, het de dert nächscht Bustrip uf üs gwartet, wo üs nach Chile wird füehre…
Don't cry for Argentina… Chile het sicher o si Reiz!
- comments