Profile
Blog
Photos
Videos
Wasserfäu vo Iguazu… brasilianischi vs. argentinischi Site…
und Uruguay… es üs bis itz eher unbekannts Land bechunt es Gsicht!
Mir hei die Nacht im Bus würklech guet überstande, abgseh dervo, ds üs Klimaalag zu Iszäpfli abe küuht het. No chli müed, da der Schlaf im Bus doch nid so töif isch gsi wie aube imne Bett, si mir du im Hotel ds Iguazu acho u hei üs grad füre Usflug zum Unesco Wäutkulturerbe, de Iguazu Wasserfäu ufgmacht. Am erschte Tag hei mir die brasilianischi Site bsuecht, wo mir zum Start ca. 20 Minute i Nationaupark inegfahre si. Nähr heimer scho die erschti Attacke vode Tier, wo usgseh hei wie Nasebäre oder so uf üsi Täsche zgspühre becho. Sie si ziemlech verfrässe u rume eim jeglechi Täsche mit öpis ässbarem drin. Aber eigentlech sis ganz härzegi Fichli u sie mische sich wie ganz normali Fuessgänger unger Tourischte.
Während ca. zwe Stund si mir nähr düre Park glofe u hei immer wieder Fotostopps igleit. Irgendwie het doch jede Wasserfau chli angers usgseh u glich irgendwie nid, aber mir hei ja nüt wöue verpasse. Drum hei mir am Abe o ca. 200 Fotos gha, womer nach gründlecher Betrachtig de o ume wit über dHeufti glösche hei. zMotto „Qualität vor Quantität" hets gheisse izhaute.
Ds Highlight vo de brasilianischi Wasserfäu het üs ersch ganz am Schluss vo üsem Spaziergang düre Park erwartet… rund 300 Grad um üs isch ds Wasser nume so abeblätscheret u het üs vom Sprütze liecht nass gmacht. Aber bi dene warme Temperature hetme die nassi Abchüehlig gärn entgäge gno. Nachdäm mir de fertig gstunet u gfötelet hei, si mir zrug i zHotel, wo mir vor luter Müedi zumne Namitagsschläfli ignickt si.
Am Abe si mir ines speziues Restaurant, wome vomne Salat- u Bilagebuffet het chöne wähle u dServierboys si nähr mit div. Fleisch vom Grill bim Tisch verbi cho. Ke Fleischwunsch isch derbi offe blibe. Nächär hets no es Dessertbuffet u e grossi Küuhtruehe vou Glace gä. Ds Tini hetsech a däm Abe am Fleisch gwidmet u ds Meli ar Glace!
Am Tag zwöi in Iguazu heimer üse erscht argentinisch Stämpu i Pass becho. De si mir mitemne Dschungulaschtwage i Park inegfahre u nähr zum Fluss abeglofe, wo üs es richtigs Abentür erwartet het. Nume im Bikini u ir Schwümmweschte si mir no chli gfrörlig im Boot ineghocket u hei de während der rasante Fahrt mitem Flussboot ersch rächt afa schlöterle. Aber wo mir dWasserfäu nähr us ca. 5m nechi gseh hei, hei mir völlig vergässe, ds mir chaut hei, da mir üs meh ufe Respäkt vor dere Wasserkraft hei müesse konzentriere. Nach paar Fotos hets de gheisse aues i wasserfeschti Seck zverrume. Itz isches üs chli chribbelig worde im Buch… e haubi Minute speter si mir de oscho mitem Boot ungerem Wasserfau gsi u ds chaute Wasser het nume so uf üs abebrätscht. Bim erschte Mau isch ds no chli komisch gsi, nach witere 3 Duschine ungerem Wasserfau isches aber de scho richtig luschtig u agnähm gsi. Ds isch würklech es super Abentür gsi u würde mir jedem witerempfähle zum erläbe.
Am Namitag si mir de 3 Stund dür die argentinischi Site vom Park gschuenet u hei wieder hunderti vo Fotos gschosse. Wie scho am erschte Tag, isch aber ds Highlight wieder ganz am Schluss cho, wo mir uf der Brüg am Rand vo dene imposante Wasserfäu gstande si u ds Wasser unger üs u näbe üs 80m i Abgrund gfloge isch. Mi steit dert u stunet eifach nume. Mi chas fasch nid beschriebe.
Der Abe hei mir de mitere private Barbecueparty abgschlosse, da mir scho wieder e Geburi ir Gruppe zfiire hei gha. Üse letschd Tag in Iguazu hät eigentlech e Kurztrip uf Paraguay a Märit vorgseh gha. Ds isch aber wäge div. Hangovers vo nid schwizerische Natione ids Wasser gfaue. Drum hei mir de gäge Abe üsi 7 Sache packt u si mitem Taxi wieder uf Argentinie inegfahre, wo mir üse Stämpu Nr. 2 vo Argentinie becho hei. Aar Busstation acho, het üs der nächscht Nachtbös erwartet, wo dieses Mau no meh Luxus versproche het. Sitze wie e breite Sofasässu u div. Screens mit Movies. Ja, mir hei üs scho fasch gföit uf die Fahrt, so bequem isch ds gsi. Aber nach der dritte Kurve isch üs scho mau dKaffimaschine entgäge cho u üse Rucksack inkl. Schlafsack isch nass gsi u het liecht nach Kaffiwasser gstunke. Nach witere 3h Fahrt hei mir im Depot vo däm Carungernäme e Tankstopp igleit. O Kaffimaschine het nöis Wasser becho. Ds het de üsem schottische Kolleg aui Haar zBärg gsteut u für ihn zberuehige het ds Tini kurzerhand ihres Tape zückt u mir hei dä Wasserbehäuter fixiert! Chum isch aues fixiert gsi, het der Bös unerwartet kehrt u isch bir nächschte Ample aghaute. Nachdäm drü Mau grüen isch gsi u der Bös ke Millimeter vorwärts isch, sondern uf ds Mau sogar hingerdsi, hei mir's de doch langsam chli lusch gfunde. Nach südamerikanische 5 Minute hetme üs de gseit, ds irgendöpis mechanischs am Car nüm fixiert sig. Bösi Zunge munkle, es sig, wüu dKaffimaschine zfescht fixiert sig gsi… 1 Fium speter hei die flotte Manne vom Carungernäme de doch entschiede, üs ine angere Car zverfrachte, dermit mir ändlech witer chöi fahre. Es si ja geng no satti 10 Stund Fahrt vor üs gläge bis nach Salto in Uruguay. Umgstiege u umpackt, hets de am morge am haubi 1 doch no ds uf die haubi 11i versprochnige Znacht gä. Die meischte vo üs hei ds aber verschlafe u aui angere hei ds Sandwich leider no die nächschte paar Tag im Mage gspührt.
Am Morge irgendwen um die achtä si mir de aui usem Töifschlaf grisse worde u hei der Car Haus über Kopf müesse verlah, da mir i Taxis umgstiege si, wo üs ghoufe hei die argentinisch-uruguayischi Gränze zpassiere. dStimmig a däm Morge isch eher trüeb u muderig gsi. Drum hei mir üs in Salto acho nähr e Ufenthaut im Spa göhnt. Ds het bedütet, ds mir bi 35 Grad Lufttemperatur dusse i 38 Grad warmem Wasser bädelet hei u nähr es Nickerchen ar Sunne gnosse hei.
Am nächschte Tag isches scho ume i auer Hergottsfrüechi mitemne Bus witer i dHouptstadt vo Uruguay, nach Montevideo gange. Mir si aui pünktlech am 6i ir Lobby gstande u nähr i 3 min zur Bösstation glofe. Üse Guide, dCourtney het für dä Wäg u aui Eventualitäte aber 45 min igrächnet gha u entsprächend hässig hei mir de aui ar Busstation ir Cheuti überne haub Stund ufe Bös gwartet. Merci Courtney!
Völlig übermüdet si mir zMontevideo acho u bim erschte Spaziergang dür die Stadt isch aues meh chli wie Näbu a üs verbi gange. Mir si eifach glofe u hei funktioniert. Ds hetsech du nähr chli besseret, wo mir am Nami ufem Mühli vo Montevideo ghocket si. Ds isch e riese Haue mit eim Restaurant am angere. Langsam chli hungrig si o mir ane Bar vo somne Restaurant häre ghocket u hei däm Grillmeischter vor üs bi sim Fach zuegluegt. Är isch zwar chli e Maccho gsi, aber zGrille isch sini Passion. Mi het ihm richtig gärn bim Schaffe zuegluegt. U wo mir de ds Fleisch u der Härdöpfu vo sim Roscht becho hei, heimer müesse säge, är hets nid schlächt im Griff.
E Duschi speter si mir de nume no fürnes chlises zNacht use gange. Ds Tini het es super süesses Biskuit mit dulce con leche (extreeeeeeeem süesses Caramel) gnosse u ds Meli hetsech mitemne riese Prussien vergnüegt.
Am zwöite Tag in Montevideo hei mir mau chli Schlaf nacheghout u am Nami simer zume Rodeofestival gange. Zuezluege wie sie die Rösser schlö, dermit si usschlö u der Gaucho sich uf däm „wiude" Ross müglechscht lang im Sattu cha bhaute, isch aber nid würklech so toll gsi. Drum si mir meh übere riesig Märit a däm Festival glofe u hei paar Souvenirs poschtet. Das öperem vor Gruppe nid so guet isch gange, isch üsi Guidin mit ihre bereits zrug ids Hotel. Zum Glück hei mir no dGaby us Guatemala derbi gha, wo Spanisch aus Muettersprach het, dermit mir nach langem Warte u Diskutiere no der richtig u für dä Abe der letschd Bös für zrug ids Hotel gfunde hei.
Am nächschte Tag si mir wieder früeh zur Busstation ghuschet, wo mir der Bös richtig Colonia gno hei. Ds isch es extrem verschlafnigs u gmüetlechs Städli mit extrem aggressive Moskitos. Nach der erschte richtig gmüetleche Kaffipouse uf dere Reis, hei mir am Nami Velos gmietet u ds Städli mit ihrer Umgäbig uskundschaftet. Ds Tini het de bim Bsuech ufem Lüchtturm ono dUssicht vo obe gnosse. Ds Highlight vo däm Nami isch aber dGlace gsi! U ds sogar für zTini. Säubergmachti u eifach perfekti Glace! Am Abe heimer dänkt, mir hole paar Pizzas u setzteüs i gmüetlech Park. Ds isch für die erschte 5 min de o gmüetlech gsi, bis dä eint bös Windstoss zGwitter u der Räge necher bracht het. Es het afa Schiffe wie us Chüble u mir hei üs ungernes Dächli müesse rette. Es hat aber so schreg grägnet u kutet, ds mir glich nass si worde. Einisch meh si mir auso düre Räge hei grennt.
Am nächschte Morge het üs e 50minütigi Fahrt mit der Fähre nach Buenos Aires erwartet. Yeah, da hei mir üse dritt argentinisch Stämpu i Pass becho. Scho kurz nachem Beträtte vor Fähre hei mir gmerkt, ds die Fahrt chli unruehig chönt wärde. Scho nach wenige Meter hei die erschte Lüt afa schreie, wägem hapige Wäuegang. U nomau paar Meter witer, het der Steward die erschte wiise Säckli verteilt, wo de ir Nechi vom Tini o grad sofort zum Isatz si cho u scho gli überlofe si. Die hei äuä aui der Trick vo Teneriffa nid kennt, dsme bi so höchem Wäuegang eifach öpis am Horizont muess fixiere, dermit ds Oug der Usglich cha mache. Mir zwoe hei auso die ganzi Fahrt lang die glichi Wolke am Himmu agstart u so ds wiise Seckli ume läär abgä. Da der Wäuegang aber würklech sehr höch isch gsi, het die Fahrt de statt 50 min o 90 min duret. Bir Ifahrt im Hafe vo Buenos Aires hei mir zwar no quasi nüt vo dere Stadt gseh, aber glich het üs ds aues scho viuuuu besser gfaue aus Rio de Janeiro…
Mir si gspannt, ob üs dä Idruck tüscht oder obmer drin bestätiget wärde...
Hola Buenos Aires…
- comments