Profile
Blog
Photos
Videos
Insuparadis Ilha Grande u Schmuckstück Paraty…
Am letschtä Tag in Rio hei mir üsi Reisegruppe lere kenne. Mir wärde die nächschtä drü Wuche mitemne Päärli us Schottland, are Schwedin, Norwegerin, Neuseeländerin u are Guatemalin ungerwägs si. Bi dä Herrä hei mir ä Dän, drü Engländer und ä Ami i üsärä Gruppe. Ussert am Amerikaner u eim Engländer si öpä aui i üsem Auter! Abgseh vo eirä Usnahm hei mirs mit aunä sehr guet.
Üsi erschti Station mit der Reisegruppe isch d Ilha Grande gsi. Mitärä drüstündigä Fahrt vo Rio imänä private Bösli u are stündige Bootsfahrt hei mir das Insuparadis erreicht. Leider isch z Wetter aber nid so paradisisch gsi wie d Inslä säuber! Denn nachem erschtä Nachtässä hets plötzlech afa Rägnä wie us Chüblä. I dä chlinä Insusträssli si plötzlech Bächli glofä. O dr Billiard-Tisch het ä Portion Rägä abbecho, wüu z Wäublech nid ganz dicht isch gsi. Aber churzerhand hetme eifach ä Chübu drungergsteut und dr Billiard-Tisch versetzt.
Am nächschtä Morge hets sunniger usgseh u drum hei mir üs ufä Wäg gmacht zum nä verstecktä Wasserfau. Mitem Gloube, dass d Agabe uf dr Wandercharte zur Schwierigkeitsstuefe vom Wanderwäg „soft" isch, si mir los gschuenet. Aber scho die erschti Stiegig vo ca. 45 Minute bi 30 Grad urä Luftfüechtigkeit vo gfüutä 100% hei mir pflotsch-nass die „soft"-Agab müessä hingerfragä. Nach witärä up's and down's hei mir z chüehlä Bad bim härzigä Wasserfau u d Massage drunger drum de umso meh gnosse! Ufem Wäg zrügg, hei mir üs bereits Gedanke zur Wanderig am nächschtä Tag afa mache, da die doch d Schwierigkeitsstufe „medium-soft" agä het gha!
Am Abe hei mir es witers feins z Nacht us dr brasilianische Chuchi dörfä gniesse… dBrasilianer chöchä würklech super! Da dr Peter am nächschtä Tag Geburstag het gha, si mir für inäzfierä i die einzigi Disco uf derä Inslä oder besser gseit inä offni Garage mit Bar u live Musig.
Nachere kurze Nacht si mir mit guetem Wiue u trotz de Erfahrige vom vordere Tag für dWanderig zur Lopez Mendes Beach ufbroche. Es hei üs 3h Schweiss u mehreri Hügle erwartet… mit viu Wasser u wiederrum nasse Chleider si mir zwar tilt, aber happy bi dere troumafte, kilometerlänge Beach mit wiisem Sand u riesige Wäue acho. Nachem bädele, isch amne Nickerchen eigentlech nüme im Wäg gstande… Vom viele Schwitze, isch abr dSunnecreme o nüm immer ganz touglech gsi u trotz Nachestriche, hei mir üs beidi es erschts Mau e schöne Sunnebrand ghout. Dä hei mir de bim Trage vom Rucksack bi üsere Witerreis nach Paraty no gspührt.
Paraty isch es chlises, härzigs, ehemaligs Fischerdörfli chli südlecher vo Rio. Es het e Autstadt mit viele wiiise Hüser u farbige Türrähme. dSträssli bestöh us grosse Steine u Lehm, was zum Loufe ziemlech tricky cha si, v.a. weme dFüess nid lüpft oder zviu redt zum Loufe. Ds chline Dörfli het zwar drü Banke, Gäut zbecho isch aber für Europäer nid so eifach. Ersch bir letschde vo dene drü Banke u nach Teschte vo aune Karte, hei mir es paar Relais chöne uselah.
Am nächschte Tag het üs es richtigs Highlight erwartet. Mir si mitemne Pirateschiff zuverschiedene härzige Buchte tuckerlet u hei ds chüehle Nass mit Sprüng vor Rehling gnosse. D Crew vom Schiff het üs zudäm uf däm Tagesusflug mit emne super Ässe verwöhnt u wie in Brasilie üblech, hets Caipirinias gä bis zum Abwinke… aber zum Glück si die nid so stark gsi, so ischs üs weder vom Caipi no vom Wäuegang schlächt worde. Da mir e super feine Lunch hei gha, si mir für ds Znacht nume hurti chli Fingerfood ga ichoufe. Chum zaut, hets aber wieder afa Schiffä wie no fasch nie gseh! Nachemne Bier u der abglofne Wartezit, wo mir veribart hei gha, si mir du de hei gsecklet resp. gschwumme. Heimer doch währedem Seckle nume überne chlini Glunge wöue gumpe u scho simer chnöitief drine gstande. Einisch meh hei mir auso üsi nasse Kleider dörfe wächsle. U wie's nid angers chönt si, hets nach rund füf Minute, wo mir im Hotel si gsi, ufghört Rägne.
Itz si mir bereits im Nachtbus richtig Iguassu Wasserfäu. Mir hei scho sächs Stund mitem private Bösli hinger üs u verbringe itz rund siebzäh Stund im Nachtbus vo Sao Paulo uf Iguassu. Da dä Car zu üsem Erstune bequemer isch, aus die erschte Hotelbett, wärde mir die längi Reis sicher guet verpfuse.
Guet Nacht u bis zum nächschte Mau.
- comments