So es isch scho wieder es Ziitli vergangä und ich han doch au scho wieder paar Sache gseh und erlebt :)

Nach 20 Jahr han ich d Marianne mal wieder gseh ... das isch dänn schön gsi ... isch also scho lang her ... frühner het sie amigs no uf die "brav" Yvonne dörfe ufpasse, jetzt zum glück ja nüm ... hehe, bin selbständig worde :)

Nachdem ich do i ihrem Hüsli es Zimmer han dörfe bezieh, jupee mal für 2 Wuche nid Koffere i- und uspacke :) hemmer dänn scho bald mal euse 1. Usflug in Agriff gno ...

Vancouver, das isch euses 1. Ziel gsi, het mer also sehr guet gfallä ... isch e uh schöni Stadt, suuber und sehr fründlich. Aber wie i jeder Stadt hets au do paar lustigi / komischi Lüüt :) In Vancouver hemmer dänn no en Usflug nach Whistler gmacht, aber isch halt scho nid glich im Winter wenn die Olympische Spiel sind oder im Summer, wenn nur chli Aalage gsehsch, janu, aber dert gsi bini ... sehr e schöni Fahrt gsi dert hi.

D Marianne chunt fascht nöd zur Rueh mit mir ... will als nöchsts sind nämlich scho d Rocky Mountains uf dä Liste gstande ...

Vor 3 Täg hemmer eus uf dr langi Weg nach Calgary gmacht ... unter anderem hemmer Lake Louise und Banff bsuecht, uh herzig, het mer sehr guet gfallä ... vorallem Lake Louise, das isch dänn e schöni Stimmig a dem See une, aber halt eifach sehr sehr viel Touris ... in Calgary hemmer dänn übernachtet und sind am nöchste Tag dur d Rocky Mountains richtig Jasper ufe gfahre ... die Rockys händ mi also au grad bizeli umghaue ... die Berge, unglaublich ... sehr sehr idrücklich ... uf em Columbia Îcefield simmer au no gsi, hihi, d Yvonne mit dr kurze Hose, mit dr Ziit isch dänn also no chüehl worde ... aber he, hauptsach ufgfallä :) ja und hüt isch eusi Fahrt grad bizeli langwilig gsi ... händ ja doch wieder hei müese, 8 Stund dur faaadi Landschaft ... gar nix interessants gsi ... janu, sind ja suscht zwei mega super Täg gsi ...

Ja und die restlichi Ziit gnüss ich do in Vernon und Kelowna, wo d Marianne diheime isch und schafft. Eifach mal bizeli nix tue, bizeli sünnele, mal chli föteli sortiere und und und ... am Samstig gats bereits wieder wiiter nach San Francisco ... und dänn chunt d Fabi, do freu mi natürlich sehr sehr druf ...

Mini Ziit vergat, bin doch scho 6 Wuche "on the road" ... aber ich han ja no paar vor mir :)

Machets guet, hoffe ihr händ chli en schöne Herbst, wenn dä Summer scho nix gsi isch :/ suscht schick ich eu dä chli Sunne hei

Yvi