Bin huet scho dae 2. Tag in San Francisco underwegs gsi. Gester zfuess und huet mitem Velo. Bin bis zu de Golden Gate Bridge gfahre, aber noed drueber, wells verdammt chalt gsi isch und extreme Wind gha haet. Han es paar Foeteli gschosse, aber noed das vo do azeigt wird. Lad denn dFotenen zumene spoetere Ziitpunkt ufe. Han do im Hostel zwar gratis Internet, aber kein USB-Aschluss. sHostel isch mega kul und zimli zentral glege. han es Bett inere Fensternische und es git es mega feins zMorge,wo im priis debii isch und huet hets sogar gratis Znacht geh. Isch au mega fein gsi. Gratis zNacht gits 3 Mal ide Wuche. Isch guet, dasses mir im Hostel guet gfallt, sind naemli die gliiche Luet wo die 1-wuechig Tour organisieres. Green Tortoise Hostel und Green Tortoise Travel.
In San Francisco isch mer als erschtes ufgfalle, dasses zimli frishc isch. es goht immer en Wind und dae isch im Vergliiich zu Mexico scho recht chalt. Isch so ca 15 - 18 Grad warm schaetzi. Als zweits falled eim halt die vile schwule und Hippies uf. und je noch dem a welere Stross mer gad isch haets au vill Obdachlosi und Punks. Bin huet ufeme U-Boot gsi und han denn echli dStadt erkundet. Es haet ganz e geile Strass zum laedele. Haight Street, heisstsi glaub. Jedefalls gits doet zimli vill sehr geili Second-Hand Laede und Schuelaede und suss no luuter hippy Boutique und Hanf-Shops. Han es paar kuli t-shirts kauft. Und denn gits doet au no en ganz geile CD-Lade. Amoeba. Doet haend gester dBreeders es gratis Konzert geh. Hammer gsi. Naja, kennt wahrschinli niemert dBreeders, aber i hans kennt und han drum mega freud am Konzert gha.
Leider bini scho wieder fast zu erschoepft zum in Usgang goh, debii isch do soviel los,
und das jede Obig. Huet wuerede zum Biispiel Sons and Daughters spiele und die vom hostel mached e Pub-Tour. Und morn spieled Dream Theater oder Does it offend you, yeah? Kennt wohrschinli au wieder niemert...
Morn mueni wieder mol waesche und luege oebi alles Zueg zeme han woni fuer dTour noechscht Wuche bruuch. Wird also eher en easy-Tag werde, aber das chann jenachdem schnell aendere, bin amel zimli spontan.
Wie gseit fotenen choemed irgendwenn spoeter. Ev scho morn ( het eigetli Ziit zum es astaendigs Internet-Cafi finde) und sosst h alt noch dae Tour... Bis denn, macheds guet

Jetzt hani gad gmerkt, dass da min erschte Itrag uf schwizertuetsch gsi isch. Hoff es verstoends alli, au die Tuetsche!