Profile
Blog
Photos
Videos
Tagwach hüt isch am 6.30 xi, so dass mir dä bus richtig Mui Ne Beach verwütscht hend. Ha denkt i nutze di füf stündig fahrt fürn wiitere blog.D busfahrt isch weniger holprig als gwohnt, do diä strecki zimli neu isch (Da lat - Mui Ne) wos diä nonig geh hät, hetti noch Nha Trang zrugg mösse und vo döt us noch Mui Ne (wöred denn insgesamt ca. 10 stund xi). s glück isch uf miner siite.. sogar s wetter xeht fü di nögste täg wunderprächtig us!! Genau richtig für paar planti kitelessons.. hoffe das klapet J vilicht wunderets eu, dassi scho so wiit im süde bin.. han no ganzi füf wuche vorig im asia part. Han drum planet no wiiter noch Kambodscha zgo.. döt werdi denn au paar lüt treffe woni in Hanoi obe kenneglernt han.. diä sind aber nöd mit richtig süde vietnam cho sondern dur Laos greist.
So etz zu miner letschte wuche.
Am samstig nomittag bini in Hoi an acho.. di ganze drü tag woni döt xi bin häts gregnet.. aber abämne gwüsse punkt ischs eim glich und mer macht was mer au bi schönem wetter wör mache.
Üses hotel isch grandios xi.. (mol kein dorm wiä idä backpackers) und s zmorge buffet eifach nur genial.. so viili frücht und di beschte pancakes!! So hät mer au richtig gstärkt chöne is grusige wetter use. Hoi an isch für zwei (eig drü) sache bekannt. 1. Di viile schöne lampions! 2. Schniederei und 3. Ä lokali spezialität Cau Lao (spezielli nudle mit schweinefleisch und croutons!).
bi dä massagfertigte chleider hani denn wiä so viili anderi nöd chöne wiederstoh. Tolls erlebnis xi..wenn d mass gno werded und wemer cha mitdesigne und dä stoff und qualität selber uswähle!.. und d aprob vo dä fertige sache (hergestellt innert ca.8h) isch eifach nur wow.
dur dä viili rege hätsdenn au scho asätz vo überschwemmige geh.. dä dorffluss isch übertrette. Wiiters hät dä rege üsn trip zu ‚My son' cancelled, ä art klein angkor wat, will alles gfluetet xi isch. Hend somit umdisponiert (sind am 7.30 am morge parat gstande) und hend üs für än chochkurs igschriibe.. somit chani etz vier versch gricht vo dä vietnamesische chuchi J inkl. früehligsrolle! Mmmmh! Am letschte tag in Hoi an häts denn klapet mitm trip noch ‚My son'.. äs isch än art tempelkomplex vo damols vo dä Cham bildet worde isch (bi interesse eifach google ;)).
Viili vo üsere gruppe sind noch Hoi an noch Nha Trang go party mache.. ha mi denn fü gmüetlichs erkunde vo Da lat entschiide zämä mitm Oliver (Künstler us England).
Donschtig Easyrider-one-day-trip. Immerhin häts für das glanget J mir hend ä tagestour rund um Da lat buecht und isch ein vo mine beschte täg bis etz xi. han extrem viil mitbecho wiäs do lebed und vo was und ha au s eint oder s ander usprobiert. Aber alles dä reihe noh. Früeh am morge.. wiä chönts au anderst si häts zerstmol wieder gregnet.. hend drum dä zmorge vorzoge.. und han glaubs s erscht mol siti am reise bi än kafi trunke woni gern han. Dä vietnamesisch kafi isch nämli extrem stark und wennd eine mit milch bstellsch denn gits kondensmilch und dä kafi isch total übersüesst.
ä halbstund spöter ischs denn los gange. Dä oliver und i hend je ein easyrider ka. Uf dä tour häts den versch stops geh.. erste halt ufere kafi-plantage.. dä thung (eine vo dä easyriders) hät üs denn d pflanze und dä prozess erklärt und was für sorte hend und das vietnam s zweitgröschte kafiexport land söll si. Wiiter hani glaub serscht mol i mim lebe xeh wiä banane würkli wachst und wiä ä banane-blüete usxeht.. isch also super interessant xi.
wiiter ischs gange zunere siedefabrik.. mer hät wieder jede schritt xeh und isch extrem idrücklich all das live mit zerlebe vom raupeconcon (hoff richtig gschriibe..) zumne fertige siedetuech. Wo dä Thung mir denn ä grösteti siederaupe (so zsäge dä reste, wemer alli siede abgspunne hät.. und das macht pro concon 700m siede us) anegehebt und meint i söll doch mol probiere, für sie isch das natürli s normalschte uf dä welt.. mit biz überwindig hani denn dri bisse und äs isch echt guet xi. komisch aber guet.. wie ä art chips eifach chli proteinhaltiger. Er hät denn au gmeint dass meh d männer in vietnam diä raupe essed (nur us eim grund.. d fortpflanzig vo dä raupe duuret ca. 5 stund und sie meined evt. hilfts jo chli J).
nögsti lernstund isch d reiswein produktion xi (logisch hend mir probiert (olma degustations halle lässt grüssen) aber nur ä chlises gläsli mitmne 60%ige… super fein xi.. plane scho dä import!).. was diä farmer nebed dä reiswein produktion mached isch ä delikatesse in vietnam (tönt scho nochhere muetprob).. nämli wiesel-kaffee. Das lauft so ab, d wiesel essed sehr gern kafibohne.. wenn diä denn hine wieder use chömed werded bohne gröstet und zu kafi verarbeitet.. klar hani au das usprobiert.. speziell xi aber nöd grusig.. ah jo und däzuä hät üs dä Thung ä blatt geh vonere pflanze wo guet für d verdauig seg.. bin mir wiä ufm buurehof vorcho woni das grüezügs gesse han J
Bevor mir denn mit üsne easyriders sind go zmittag esse (super feine localfood) hend mir no chöne än wasserfall go besichtige. Sind ganz abekletteret, so dass mir underem bzw hinderem wasserfall gstande sind. Wasi au ha mösse lerne.. mer söt nöd zlang döt stoh, wills än beriich isch wo zviil suurstoff hidruckt wird und mer än art än flash chönti becho. Äs hät wiiteri stops und erklärige zu dä agrarkultur, zu blueme farme und tempel geh.. denn ischs zrugg noch Da lat city gange.
Noch churzer erholigs phase im hotel ischs ufgange uf d suechi nochmne fotograf (mir beidi bruched nämli passfotis für s visa in kambodscha).. hend üs uf üsere suechi probiert mit händ und füess und zeichnigskünst z erkläre.. bis mir denn än kodak foti shop gfunde hend. Sie hend üs denn in cheller brocht wo sie ä art fotostudio igrichtet hend mit schminkpult und diverse stofftierli fü chind. So häts än churze schnappschuss geh vo jedem vo üs.. mir nehmed a sie hends denn no per photoshop bearbeitet, wills so ‚soft' usxeht.. noch 20min warte hend mir je acht fotis für grad mol 2USD idä hand ka.
än schlummertrunk (nai nöd alkohol.. sondern ä warmi sojamilch mit zucker) häts denn zum abschluss vom tag geh, direkt vis à vis vom hotel.
jo und etz hocki do im bus und warte bis mir am beach achömed. (d strosseverhältnis hend sich unterdesse wieder um einiges verschlechteret.. eimol hani scho biz schiss ka wills uf dä einte siite steil abwärts gange isch und mer hät xeh dass än teil vo dä stross scho abgrutscht xi isch.)
Da wörs au scho wieder.. natürlli in kombi mit paar fotis.
hugs liv
- comments