Profile
Blog
Photos
Videos
Di planti vierstündig busfahrt vo Phnom Phen to Siem Reap hät sich denn um 2.5h verlängeret. D strosseverhältnis sind prekär xi und wills idä letschte täg so viil überschwemmige geh hät, isch eigentli nur d stross zxeh xi und links und rechts wasser. D hüser vo dä lüt adä stross entlang sind teils nur no per provisorischi brückli z erreiche xi oder per boot.
min kolleg vo Hanoi (Mubine) hät tapfer a dä bushaltestell in Siem Reap uf mi gwartet mitm Pat üsm tuktuk fahrer. Finally acho.. hät sich au sofort min mage gmolde. So sind mir noch churzm stopp im hotel (gepäck abgworfe) direkt is zentrum und hend geniale localfood ka bim essensmarkt (viili chlini restaurant mit portablem grill und tisch und schämäli).
Bevors am nögste tag denn richtig tempelbesichtigung gange isch.. hani mir no luftigi aladin hose kauft.. will d chnü und d schultere söted bedeckt si. Noch 15min tuktuk fahrt (sehr erfrischend mitm fahrtwind, will d temperature sind über 30°C xi) sind mir denn scho bim haupttempel ‚Angkor Wat' acho und hend dä chöne uf eigni fuscht go erkunde. Da isch mit viilne steinerne stägätritt und spinnenetz verbunde xi und natürli viilem stuune inkl. Aahs und Oohs. Wiiter uf üsere erste Tempelrundi sind denn no vier wiiteri gstande.. wobi min absolute favoritetempel (super wort.. luschtig dass mer das cha ha ;)) dä tempel ‚Bayon' xi isch.. (siehe foto). Noch 4.5stund tempel sind mir den ustemplet xi.. total verschwitzt und kaputt.. mitm tuktuk zrugg is hotel füre erfrischendi duschi und än powernap.
Am suntig hend mir noch usgibigem schlofe planet ka ines waisehuus zgo um döt mit dä chind ä chli ziit zverbringe.. english z spreche und z spiile. Uf diä idee sind mir duren andere hotelgast higwiise worde.. er selber bsuecht das waisehuus etz scho sit 2.5monat täglich. Das mir nöd mit leere händ cho sind, hend mir vorher no churz än stopp bim markt gmacht und äs gummiseili gsuecht (planet isch ä grossi gummitwist rundi xi).. leider häts keis ka und mir hend üs füres normals fiins rots seili entschiide. Jo und denn.. erklär sones spiili mol amne huufe chind wo meh freud a dir (als chletterbaum) hend als amne spiili wo mer söt zuelose dass mers verstoht J. Schlussendli ischs seili brucht worde zum armbändeli zchnüpfe und zaubertricks zmache. Hend ufjedefall drü sehr intensivi.. herzlichi stunde mit dä chind ka (wo zw. 3 und 14johr alt xi sind).. hend viil glachet und saich gmacht.
Üsn zweite tempeltag isch us eim grund spezieller xi als dä ersti.. dä wecker hät am 04.20 gschellet und mir sind no halbe i üsne troim is tuktuk chäreli kletteret zum dä suneufgang mit tempelkulisse zxeh. Dä Pat hät au nöd son helle idruck gmacht.. öbs etz zwenig schlof xi isch oder än kater vom vorobig, hend mir nöd usegfunde, sind aber froh xi wo mir heil acho sind.
sind sich scho viili lüt am in position bringe xi.. glücklicherwiis hend mir aber no äs super plätzli verwütsch und än unvergessliche moment chöne gnüsse. Aschlüssend ischs denn uf di zweiti tempeltour gange.. einiges agnehmer als di ersti, dos nonig so heiss xi isch und alli touris no meh oder weniger am schlofe.. so het mer alles fü sich ka J
wiä bi dä meiste tempel häts immer viil chind ka wo dir öpis hend wölle verchaufe.. zum is gspröch zcho isch ihri ersti frog immer xi.. Where are you from?.. uf d antwort hends denn idä jewilige sproch vo 1-10 zehlt und dir chöne d hauptstadt und population nenne. Ei chind häts meh als ä spiili gmacht.. sprich wennd im TicTacToe verlürsch (so wiä i J) muesch öpis chaufe. Han denn am bueb min letschte chaugummi geh und a dem hetter glaubs meh freud ka, als dass er öpis cha verchaufe.
Am obig hend mir üs denn mitere kollegin (Ruth) troffe wo mir in HalongBay kenneglernt hend und i han sie uf minere reis scho mehr mols uf mim weg krüzt. So sind mir nochm znacht no id barstreet öpis go trinke. Und was für zuefäll git uf därä welt.. a dem obig hani ca. 10 lüt vo basel troffe. Mit ihne hani mini erste zwei johr studiert und sie sind etz im wahlstudiejohr amne kongress in Siem Reap. D Esther hät zimli erstuunt/entsetzt/?? im gsicht usxeh woni mi näbäd si gsetzt han. J glücklich wieder mol chli chöne CH-dütsch zschwätze und bekannti gsichter zxeh ischs denn no än super obig worde.
Mit zwenig schlof ischs denn am nögste tag mitm boot richtig battambang gange. S positive dra.. mir hend d floating village so no xeh, aber dä boottrip sus.. naja. Mir sind direkt nebedm motor gsesse.. somit nöd chöne mitenand rede und a schlof isch nöd zdenke xi. d sitzbänkli us holz.. leider nöd polsteret.. somit häsch no zwei vo insgesamt sechs stund nüme gwüsst wiä du etz no anderst chöntisch ane sitze. (reisegruppe: eigil, steven, rebecka, mubine und i)
I üsne knapp zwei täg in Battambang hend mir zerscht wölle dä bambuszug usprobiere (ä zimli simpli sach.. aber ä erfahrig meh ;)).. dä steven und d rebecka sind nöd mitcho (steven chrank, rebbeka halschehri). Dä bambuszug isch nur eigleisig xi.. wenn also gegeverchehr choisch hät eine vo beidne mösse sini plattform weg bewege und nochher wieder zämäsetze bevors wiiter gange isch. Am end vo dä strecki bisch denn zumne kokosnussdrink überredt worde und d chind hend dir bibrocht wiä mer us palmblätter chan sache flechte.
Am obig hend mir üs fürn lokale zirkus entschiide wo idä region sehr bekannt isch.. somit sind zueschauer ca. 80% iheimischi und 20% tourischte xi. was diä junge erwachsene und chind zeiget hend isch genial xi. mer hät ihne richtig axeh dass das wo sie mached ihne freud macht und sie stolz sind das anderne chöne zeige.
Am donschtig ischs denn mitm bus zrugg noch Phnom Phen gange (interessant xi.. do s wasser zrugg gange isch inerhalb vo dä letschte wuche und alles anderst usxeh hät).
so heisst fü mi noch einere wuche Camodia scho..
Byebye Cambodia, Hello Thailand!
- comments