Profile
Blog
Photos
Videos
Sabadi us Laos
Sit oebbe 5 Daeg simmr zLaos, em noerdliche Nochbr vo Cambodia, und haen dZyt ufere wundrschoene Insle ufem Mekong - dasch e lange Fluss - gnosse. Jetzt abr zu Cambodia:
Am 19.11. simmr miteme Speed-Boat vo Chau
Doc (Vietnam) nach Phnom Penh (Cambodia) grast. Doert ako haen mer grad mit dr Isabelle und em Jerome, wo ebefalls au kurz drufabe ako sin, abgmacht gha. E glaini Randnotiz: Das sin zwei Kollege us Basel, wo e ganzes Joor in dr Waeltgschicht ummehoesele :) Zaemme haen mir denne drei Daeg Phnom Penh erkundet. U.a. haen mer dKilling Fields bsuecht (doert sin x-tuusigi Kambodschaner zwuesche 1975-79 unter dr Herrschaft vo dr Rote Khmer ermordet worde), dr prunggvolli Koenigspalast mit dr Silbrpagode und halt sunscht dStadt aagluegt. Glychzyttig mit unserem Ufenthalt doerte het sWasserfestival stattgfunde. Gemaess Medie wohne 2 Mio. Luet in Phnom Penh und waehrend daem Fescht solle no zuesaetzlich 2-4 Mio. Mensche nach PP ko si. Also koenned Euch oebbe vorstelle, was doert los gsi isch, v.a. zObe - dr Wahnsinn. Leidr het das Fescht miteme grosse Ungluegg (Massepanik) mit zahllose Todesopfer gaendet - ihr haend das sichr ueber dMedie mitbeko.
E grossartigs Erlaebnis haemmer gha, wo mir zu viert ufere Riismatte (ufere Wise) vorem Palast Karte gspielt und drzue Bierli drunge haen. Das zwuesche gschaetzte 50'000 andere Luet. Kleini Kindr haen ys zuegluegt und haen gholfe dr Isabelle d'Karte sortiere - wohrschinlich haen die sofort gseh gha, dass si doddal uebrfordered gsi isch bi daene Spieli ;)
Am letschte Obe haen mir sGotti und dr Carlos droffe - si haen Ferie gha und sin ebefalls grad fuer drei Daeg zPP gsi. Mir haen si in ihrem gschichtstraechtige Hotel, em Royal Les Raffles (doert haen sich die wenige Journaliste miesse ufhalte waehrend dr Herrschaft vo dr Rote Khmer), droffe und sin vo ihne zumene grossartige zNachtaesse yglade worde. Mit grossartig meini wirglich grossartig. Sisch fuer uns sit langem widr mol e supr-affegails Aesse gsi mit Wyy und Kaes zum Abschluss *sabbr*. Ich ha sogar swestliche Menu gha mit u.a. Ganselaebere und sunschtige Sauereie. Eifach herrlich gsi. Und e glatte Obe no drzue :) Nomol dange Euch zweine!!!!!
Zaemme mit dr Isabelle und em Jerome (em saelbschternannte Jasswaeltmeischtr, wo abr nid weiss, wie me gwuennt hihi..) simmr denne per Bus nach Siem Reap gfahre, wo mir vier Daeg vrbrocht haen. Siem Reap isch dr Usgangspungt zu de Taempelaalage vo Angkor Wat und allne andere Wats rundum. Mir haen notuerlich einigi vo daene Aalagene bsuecht gha, was vrdammt ydruegglich gsi isch - wobi dr schoenschti Taempel nid mol dr beriehmtischti (Angkor Wat) gsi isch sondern dr Bayon. Doert haen mer au ganz frieh am Morge aagfange - haen tatsaechlich sHotel am 04.30 vrloh - und haen die mystischi Stimmig zum Sunneufgang gnosse. Dr ganz Daag simmr denne vo Taempel zu Taempel ghoeseled, d.h. per Tuktuk, do dDistanze riisig sin zwuesche de einzelne Taempel. Dr Daag druf isch dr Jerome leidr mit deftige Mageproblem und em Schisser flachglaege - mir wuesse nid wirglich, wo aer dae Seich ufgschnappt het, aber leidr hetr ume Wuche lang Problem gha und isch ab und zue widr mol gsegglet. Zum Gluegg haen mer so odr so e Chill-Daag inezoge und haen das haerzige und gmietliche Staedtli Siem Reap gnosse, sodass sich dr Jerome kli het koenne erhole. Am neggschte Daag sin denne dNici und ich mit zwei Pole, wo dIsa und dr Jerry bereits kennt haen, zu witer entfaernte Taempelaalage gange, was sehr lohnenswaert gsi isch. Abr zum Euch e Bild gaeh: mir sin ueber 100km miteme Tuktuk an daem Daag ummegheizt hehe..
Eigentlich haette dNici und ich e Flug am 26.11. vo Siem Reap (Cambodia) nach Pakse (Laos) gha - do aber unseri Basler-Frynde dIdee gha haen no in Oste vo Cambodia zgo und mir ghoert und glaese haen, dasses doert sehr wenigi Tourischte ha soell und mir so odr so nonig sGfuehl gha haen das Land wirglich gseh zha, haen mer uns denne spontan drfuer entschide mit ihne no dr Oste vom Land go unsichr mache. So haen mer denne die beschwerlichi Reis (am Schluss sins oebbe 12h gsi) uf uns gno und sin am Morge frieh miteme Bus quer durchs Land in dProvinz Rattanakiri, bzw. nach Banlung, gfahre. Das toent jetzt fascht zeifach. Unsere erschte Bus het Problem gmacht und so haen mer denne in e andere miesse umstiege wo zimlig ueberfuellt mit Backpackers gsi isch - aber zum Gluegg isches in Cambodia jo nid so heiss ;) - sisch eim kli vorko, als ob die Luet z.T. vor sich haere vegetiert haen - e Aenglaendr naeb mir het sich denne au prompt zwei Valium (vo Roche) igworfe gha, wellr so wenig wie moeglich vo daem Trip het welle mitbeko....
Fuer die neggschte zwei Daeg isch denne volli Entspannig aagseit gsi. Mir sin zweimol in e Vulkankrater, bzw. in See, wo sich drin bildet het, go Bade und haen eifach das affegaile Waetter gnosse. Zuedaem haen mir e Heisshunger uf westlichs Aesse gha (d.h. dr Jerome und ich haen ununtrbroche vo Wurscht-Kaes-Salat gredet *seufz* - ich daeng immer no daeglich anen). So haen mer denne zum einte Miitagsaesse affegaili Double-Cheese-Double-Irgendoebbis-Burger gaesse - isch wirglich supr fein gsi. Das no voellig unerwartet :) Am zweite Daag sin mer denne mit vier Scooter ostwaerts gfahre, wo mir denne, nachere wundrbare Fahrt durch sehr abwaegsligsrichi Landschafte, fuer e Stuendli uf zwei Elefante durch dr Tschungel gritte sin - isch witzig gsi und v.a. schoen, do mir die einzige gsi sin.
Am neggschte Daag isches denne via Stung Treng (2.5h Bussfahrt) witr zur laotische Graenze gange - doert haen mer denne zerscht uf dr kambodschanische Site je miesse e Dollar aneblaettere und aaschliessend uf dr laotische Site, ebefalls e Dollar - immerhin haen mir Schwizer sPrivileg, dass mer kaini Visas fuer ca. 38 Dollar haen miesse beatrage, do mir nid mehr als 15 Daeg im Land waerde blybe.
E glains Fazit zu Cambodia: SLand isch sehr schoen, dLuet sehr fruendlich, aber im Verglych zu Vietnam saumaessig arm - mir haen leidr vieli verstuemmleddi Luet (Landmine) aadroffe und au viel Mensche uf dr Stross schloffe gseh. Trotzdaem isch Cambodia e Bsuech waert. D.h. mir persoenlich het Cambodia erscht nacheme Zytli wirglich guet gfalle, do ich mit Phnom Penh nid wahnsinnig warm worde bi.... Bi abr sehr froh, dass mer einersits no die witeri Umgaebig vo Angkor Wat (zaemme mit de Pole) und denne no dr Oste vo Cambodia erkundet haen. DZyt mit dr Isabelle und em Jerome isch grossartig gsi - haens luschtig gha, viel Spieli mit ihren (aafaenglich no schoene) Jasskartene gmacht und viel ummebloedlet. Jetzt freue mer uns, si huet zObe nomol in Luang Prabang (Nord-Laos) aazdraeffe.
Uns gohts beschtens :) e liebs Griessli us Pakse,
Nici & Arno
- comments