Profile
Blog
Photos
Videos
Woopwoop next Stop Hawaii :-). Mir si zur Abwächslig eis gar nid ga liege u si direkt a Flughafe u am 03:00 Uhr vo Puerto Rico nach Washington D.C gfloge u ner vo dert us nach Honolulu. Insgesamt heimer öpe 16h ka, aber alles isch super gloffe, abgseh da dervo das mir mit der United Airline si gfloge haha, sie hei üs nid usegschosse oder eso, aber sie si unfründlech gsi wiene morä und mä het fasch alles müesse zahle, abgseh vom Wasser u vom Kaffi äjäjäj. :-) O hie heimer nach der Akunft o scho äs schöns Gschichtli uf Lager, mir hei vom Flughafe mitem Bus nach Waikiki Beach wölle fahre wüll das am günstigste wäri cho...mir si da nichts ahnend igstiege u ner seit üs doch d Busfahrerin mir dörfe mit üsne grosse Backpacks nid mitfahre, da sigi gemäss Gsetz eso. Mir hei verblüfft dri gluegt u si du ner halt umi usgstiege hahahha. Dernah si mer halt a Taxistand u si ner mitere Limusine zu üsem Hostel gfahre, hahah das het o köstlech usgseh. Für die nächste zwöi Wuche hei mir umi Bsuech vor Schwiz und das vo üsere Dänneler :-). Mir hei üs füre Afang mau 5 nächt imene Hostel näbem Waikiki Beach iquartiert u hei ner vo dert us Sache underno. Mir wei nämli när Insle wächsle u drum heimer denkt bliebe mir gad ir nechi vom Flughafe ;-) Was mir so gmacht hei: - Waikiki Beach & Shopping Mir hei üs natürlech o ä Meinig müesse bilde über dä bekannt Hotspot "Waikiki Beach" und mir müesse sägä dä isch scho schön, aber halt o mega überfüllt, da gits no viel viel besseri Stränd ;-). Was super isch sie hei usse im Meer so wienes Müürli gmacht, wot Wälle brämst, das mä gäbig cha bädele. D Promenade isch o hennä schön u shoppe chame hie o wie d' Weltmeister, z Ala Moana Shoppingcenter isch riiisig, die spinne. Aja u Japaner hets hie o wie am Loufmeter =P. - Diamond Head (Leahi) Dä Krater isch z Wahrzeiche vo Honolulu & Waikiki u dr Hike geit öpe 20min bis mä dobe achunt, mir hei dä gad z Fuess vom Hostel us gmacht u drum heimer äs Spüürli lenger ka, aber d Ussicht vo dert obe isch eifach dr hammer! Es empfiehlt sech nid gad am Mittag z gah, wüll mä den fasch nieder geit ab der Hitz, mir spräche us erfahrig ;-) haha. - Party Feschte chame in Honolulu also o ganz guet. Ar Danja ihre Geburi heimer eigentlech ar 1$ Night im Mooses wölle ga fiire, wo geng am Di isch u das wär ja gad perfekt gsi, aber mir hei ner am vor Abe so voll Gas gä bim ine fiirä im LuLu's (dert stiegt d'Party geng am Mänti) u drum isch die 1$ Night du ner nüd worde haha. Mir si halt o nüme die jüngschte, aber das wär so ä heisse Tip am Rande, falls dir Mal uf Honolulu göt ;-). - Pillbox Hike & Laikana Beach Mir si mitem Bus vo Waikiki us d' Südostküste ufgfahre bis nach Kailua u si dert ner umgstiege für a Laikana Beach. Das isch öpe 1.5h lang gange, aber äs isch ä wunderschöni Küstefahrt gsi u zahlt hei mir je nur 2.50 $. Mir si du ner vorem Beach nöime usgstiege u hei der Pillbox Hike gmacht, äs isch zwar äs Verbotschild bim Start gstande, aber das het niemer dranne ghinderet ;-). Es isch öpe 30min ufwärts gange u das nid gad mitem beschte Wäg, aber wo mir obe bir Plattform si acho, het mä äs bombastisches Panorama ka, eifach Wow! Dä chöimer also o nur empfähle. Dernah simer a Laikana Beach ga bädele u dä isch also sehr schön gsi, wisse Sand mit türkis blauem Wasser und nid überfüllt. Zrug hei mir ner der chürzer Wäg gno mitem Bus dür z Landesinnere :-). D' North Shore het üs leider nümme glängt z mache, aber hei also o nume guets über das kört.
- comments