Profile
Blog
Photos
Videos
Ecuador mit Galapagos
Cuenca
Üsi erschti Station in Ecuador isch Cuenca gsi. Vo Mancora us hei mir es chlises privats Bösli gha, wo üs i rund siebe Stund dert häre het bracht. Närvigerwis het dAgency no zwöi witeri Persone uf ds Bösli buechet, so dses richtig äng isch worde. U wiemer nach paar Minute hei fescht gsteut, si ds zwo Lehrerinne usem Graubünde gsi, wo ihres Rumantsch quer düre Van zum Beschte hei gä u üs angere dadermit a däm Morge chli gnärvt hei. Üsi Gudin het am Vorabe no dütlech gseit, ds mir üs ufne dirty Gränze söue isteue, wo viu Sache aube gstohle wärde oder furt chöme. Chum si mir bir Gränze acho, het üs aber dünkt, ds die subere u ziemlech neue Gebäude auso nid so e dirty Idruck mache u es het chum Lüt umegha, wo eim vo üs öpis hät chöne stähle. Sie isch de fasch us aune Wulche gheit u het nid verstande, ds es itz dert sone schöni nöii Gränze git, isch aber o erlicheteret gsi, dsmer so schnäu u eifach hei chöne uf Ecuador ireise. Die erschte paar Kilometer simer dür Dschungugebiet mit riesige Bananeplantage gfahre u hei üs de mitmene Strunk pinkfarbiger Banane ideckt. Die si chli dicker u süesser aus die gäube, wo mir üs gwöhnt si. Nähr isches no tou dür Bärge gange, bevor mir i däm Cuenca acho si. In Cuenca simer de ir Mall ga Schutte luege, wüu a däm Tag der wichtig WM-Quali Match zwüsche Ecuador u Argentinie gsi isch. Wie erwartet het trotz der Euphorie vode Ecuadorianer Ecuador ziemlech höch verlore. Am nächschte Tag simer no vorem Zmorge i dMarkthaue, wos auerlei zÄsse zdegustiere u zchoufe het gä. Üse Dän het de am morge am 10i scho mau es Meersöili probiert u verdrückt. Wäh!!! Mir angere si du nähr lieber richtig ga brunche, bevor mir i dPanama Hat Factory si. Dert simer zersch dür ds chline Museum u hei glert, wases aues brucht bis so e Panama Hat fertig isch. Im chline Lade näbem Museum hei mir üs de es günschtigers Exemplar vo dene Hüet aus Suvenir u super Sunneschutz zuegleit. Wüu der Inhaber vo dere Fabrik so Fröid a üs het gha, heteris de mit sim Van no grad zum Museum artesanal gfahre. Ds isch aber wägem nationale Kids Day zue gsi. Ar Steu vom Museum si mir de no chli dür zStädtli gschlenderet u hei die viele Kiuchene u Plazas bewunderet u gfötelet.
Baños
Am nächschte Morge hets bereits am 5i Tagwach gä, wüu üse Bus für uf Baños bereits am 6i gfahre isch. Ds isch es chlises Dörfli, wo sehr bekannt isch für sini Hot Spings u Outdoor Adventure Activities. Mir Froue hei üs de vorem Znacht no are sogenannte Tortur à la Ecuador ungerzoge. Ds het bedütet, ds mir imne Spa si gsi, womer i Dampfwanne ghocket si u gschwitzt hei u zwüschine immer wieder mit iiiiischautem Wasser abduschet si worde. dChrütli im Dampf u der Chrütlidrink hei söue häufe zum Entschlacke. Es isch für üs nid würklech e Tortur gsi, sondern sehr entspannend u relaxend. Nachem feine liechte Salätli zum Znacht simer de nomau chli i Usgang. Am nächschte Morge isch zTini ga zipline u ds Meli ds Dörfli ga uskundschafte, bevor mir am Nami mit aune Froue vor Reisegruppe e Ganzkörpermassage si ga gniesse. Am Abe hättemer eigentlech ines argentinisches Restaurant wöue ga ässe, aber ds het wäge Ferie vom Inhaber grad zue gha. De hei üs dJung vor Adventure Agentur kurzerhand zumne Barbecue bi ihne dahei iglade. Es het extreeeeem viu zÄsse ga u es isch super fein gsi u wüus so gmüetlech isch gsi am offne Füür zhocke, simer de ono bis speter ir Nacht dert blibe. So spät, ds der Portier vom Hotel scho so töif gschlafe het ir Lobby, dser weder ds Lüti no ds Telefon ghört het u nid mau erwachet isch, wo ds Tini kurzerhand über zTor im Garte klätteret isch u Türe nähr vo Ihne ufta het. Am nächschte Tag isches de nachemne Brunch mau wieder ufne Bus gange, wo üs uf Tena gfüehrt het.
Tena
In Tena acho, hei oscho zwöi Vans uf üs gwartet, wonis zure Community im Dschungu bracht hei. Dert hei mir 3 Tag bire Familie imne Homestay verbracht. Üsi Hüsli si ganz eifach us Houz u Paumeblätter bout worde u über jedem Bett hets wäge de aggressive Müggeli es Moskitonetz parat gha. Am erschte Tag si mir nachem zMorge mit üsem Guide, am Dauphine quer düre Dschungu gwanderet. Zum Teil hei mir aber o die wiude Wasserfäu müesse ufeklättere, so dsmer richtig nass si worde u o Gummistiefle nüm gnützt hei, da ds Wasser ob ine glofe isch. Mir hei viu Grüens u paar chlini Krabutierli, wie Kakerlake, Skorpione oder o Fröschli gseh. Au die angere heisech leider vor üs versteckt. Speter het är üs im Dschungugebiet näbem Huus de no zeigt wieme allei im Dschungu cha überläbe u weli Pflanze für was es Huusmitteli si. Ds isch zwar ziemlech interessant gsi, aber mir hoffe trotzdäm, dsmer nie allei im Dschungu si. Am Abe isch zTini mit der Gruppe de no es Voumond-Rafting ga mache. Ds isch e ziemlech wiudi Fahrt gsi u chli fischter, da der Mond vode Wulke verdeckt isch gsi. Ds Meli het mit ihrem sensible Mage mau wieder dörfe zBett hüete. Am nächschte Morge simer de die örtlechi Schueu ga aluege u hei de Schüeler dert es Bsüechli abgstatet, da aber am Abe vorhär es Fescht im Dorf isch gsi, si nume afe drü Schüeler dert gsi. Zudäm hets die ganz Zit ziemlech stark grägnet, so ds o nid aui Kind i dSchueu hei chöne cho. Nachem Mittag het üs der Dauphine zeigt, wieme Pfile für ds Blasrohr macht u mir hei de die säubergmachte Pfile grad mitemne Schuss ufne Wassermelone usteschtet. Überraschenderwis hei dFroue viuuuuu besser gschosse aus dMänner, was dene de chli suur ufgstosse isch. Am Abe heimer de bimne offne Füür no glert, was sie im Dschungu so für traditionelli Fiirlechkeite hei u hei säuber grad dörfe mittanze. Die drü Tag im Dschungu si für üs e gueti Erfahrig gsi, aber viu länger hättemer dert nid wöue blibe, da üs doch so langsam aues chli bisse het u dMugge üs plaget hei. Drum simer froh gsi, womer am nächschte Morge mitem Bus vo Tena richtig Quito gange si.
Quito
In Quito acho, heimer mau üsi nasse Kleider müesse uswäsche u ufhänke. Ds Meli isch grad chli hässig gsi, ds die Sache aui so gstunke hei u nid hei wöue tröchne. Am Abe simer nachem Znacht no i dAutstadt vo Quito u hei dert e Beizetuur gmacht. Es sich ziemlech chüuh gsi u drum si üs die Glüehwii ähnleche Getränk grad rächt gsi. Derzue heimer bimne Livekonzärt vore ecuadorianische Band chli tanzet u der Abe gnosse. Am zwöite Tag in Quito si mir dAutstadt by day ga aluege u hei diversi Chiuchene bsuecht. Vor Basilika us heimer i schwinduerregender Höchi dUssicht über die ganzi Stadt gnosse. Nähr heimer üsi Bäckli füre Fuessbaumatch Ecuador gäge Kolumbie la bemale u si der Match uf eire vode viele Plazas ga luege. Ecuador het dä Match mit 1:0 gwunne! Yeah! Am Abe simer ines mega feins Restaurant ga Znacht ässe, wo v.a. dCrepes zum Dessert der Wahnsinn si gsi. Zrug bim Hotel hei mir üs de vo witere zwöi Gruppegspändli müesse verabschiede, da sie entweder hei oder witergreist si am nächschte morge früeh. Mit de übrige drü Guys si mir am nächschte Tag zur Mitti vor Wäut gange u hei dert im Muesum diversi Experimänt uf der Äquatorlinie gmacht. Mir hei nid schlächt gstunet, wie sehr dKräft dert angers würke u hei üs no dKoordinate 00 i Pass la stämple. Am Abe simer nachemne Aperodrink ines mongolischs Restaurant ga ässe u hei üse erscht Abschiedsabe vor „Amyfamilie" (Carrie u Ken us Washington aus Euter u der Dänu us Dänemark sowie zMeli aus Kind vo ine u zTini aus Frou vom Dänu) gfiiret. Am Tag druf hei de mir zwöi üses Hotel müesse wächsle, da mir für dGalapagostour ume e nöii Gruppe hei troffe. Es isch mau wieder chli es Züg gsi, i welem Hotel mir üs müesse ifinde, aber nach längerem hets de no klappet. Es isch es ziemlech schiggi-miggi Hotel gsi. U bis am Abe simer no nid sicher gsi, obmer würklech richtig si, da üsi Näme ufem Informationsblatt eifach gfäut hei. Bir Info zur Tour hetsech aber de aues klärt u mir hei bestätiget becho, ds mir doch richtig si. Nachdäm mir üsi siebe Sache für dGalapagos packt hei gha, heimeris zum aueriletschde Dinner mit üsere Amyfamily troffe. U nähr hets ume gheise „Goodbye". Mitem Dänu si mir voui drü Monet ungerwägs gsi u mir hei ihn würklech ids Härz gschlosse. Bau chli komisch gsi Ade zsäge. Aber aues het haut mau es Ändi.
Galapagos
Der Galapagostrip het mitemne kurze Flug uf Guayaquil agfange, wo mir no Passagiere hei la zuestiege, bevor mir witer gfloge si uf dInsle Baltra. Dert simer de mit Böse ure chline Fähre sofort witer uf dInsle Santa Cruz, wo mir uf üses Huusboot ichecket hei. Nachemne erschte kennelere vor Gruppe umne Lunch simer am Nami dDarwin Station ga aluege, wo dSchiudkröt vo jedere Galapagosinsle schön rassegetrennt ufzoge wärde, bevor sie wieder uf de einzelne Insle usgsetzt wärde. Dert heimer aber o Wasser- u Landleguane chöne bestune u de orange Krebsli i dOuge luege. Am Abe simer de zerschte Mau los tukerlet u zur nördleche Site vor Insle gange. Am nächschte Morge heimer dert e Landspaziergang gmacht u Vögu sowie Landleguane beobachtet u bim erschte Schnorchugang dUngerwasserwäut vode Galapagosinsle entdeckt. Mir hei viu bunti Fischli u oscho grad zum erschte Mau e Hai gseh. Ds isch üs de no grad chli komisch vor cho so nach amne Hai verbi zschwümme. Drufabe simer mitem Bootli ine angeri Bucht, womer am Nami nomau chli gschnorchlet hei. Am zwöite Tag uf de Galapagos simer uf dIsla Eden ga Seehünd beobachte. Bim Schnorchle hättemer nähr eigentlech Seeschiudkrötli söue gseh, aber die si bim Feus grad nid dahei gsi. Derfür heimer mitemne Seehund chöne schwümme u scho wieder e Hai gseh. Nachem Mittag simer mit de Schluchböötli chli ar Küschte nah gfahre u hei die erschte für Galapagos bekannte Blaufusstölpel gseh. Bim Schnorchle nähr, hetme wüu ds Wasser so trüeb isch gsi, leider nid so viu gseh, ussert wär gloubs, mau wieder e Hai. Bir Witerfahrt am Abe heimer Delphine näbe üsem Boot gseh schwümme u gumpe. Am nächschte Tag si mir zur Insle Bartolomé, womer zersch ume e Landspaziergang gmacht hei u Tier beobachtet hei u am morge wie am Nami si ga schnorchle. Bim Schnorchle am Nami isches du chli fischter gsi, das viu Feuse gha het u zMeer würklech töif gsi, derfür heimer aber zwe Roche gseh. Zrug ufem Boot isch de e Rieseschiudkrot a üs verbi gschwumme. Am vierte Tag simer am Morge zumne Ussichtspunkt ufe glofe u hei dUssicht über dInsle gnosse. Zudäm heimer bir Fahrt mitem Schluchböötli die erschte Pinguine gseh, womer de nähr o bim Schnorchle nomau atroffe hei. Die flitze ziemlech rassig dür ds Wasser. Bi däm Schnorchugang heimer o extrem viu Seestärne i aune Farbe u Variatione gseh. Am Nami simer no zur letsche Insle zu „Sombrero Chino" tuckerlet. Dert heimer dSeehünd am wiise Sandstrand bim Chille chöne beobachte u bim letschde Schnorchle nähr nomau amne Hai ids Gsicht luege. Dert heimer o zum erschte u letschde Mau Wasserleguane IM Wasser gseh. Am letschde Tag simer i auer früechi vorem Zmorge nomau zude Seehünd use gange, bevor mir de via der Insle Baltra wieder zrug uf Quito gfloge si.
Quito
Hie in Quito hei mir ids no 2 Täg zum richtig packe u ussortiere, bevor mir nach drü Mönet Südamerika de wieder hei i die hoffentlech warmi Schwiz flüge. Mir fröie üs ufds hei cho. =)
- comments