Hüt Morge simer z'Stormriver abgfahre mitem Ziu z'Weekend in Knysna z'verbringe!
U siehe da, mir heis gschafft!

Aber vorhär simr no go Wandere bim Robbenberg bei Plettenberg Bay!
Über 8 km aus ar Küste entlang mit super Sicht die ganzi Zyt.
Dr Hai heimr grad am Afang gseh...evt het dä im ruhige Wasser gschlafe!

D Roppekolonie hetme gschmöckt bevor dasmese het gseh. Drum ja o dr Name vo dere Marine Protected Haubinsle. Isch spannemd dene quirlige Ungerwassertorpedo ufdr nordsite bim spiele u ufdr Südsite ir höche Brandig bim jage zuedsluege. D "Wanderwäge", meh e Chlätterparcours, si zum Teil hausbrächerisch über d Klippe grediufe u aues angere aus SUVA konform. Farbe u Idrücke wunderschön u unvergässlech.

Itze vorem Chalet höckle u e pseudo Sundowner (Wätter het grad chli umgschlage) usem Doppelliterpack Shiraz gniesse. Di, hoffentlech warmi, Badwanne wartet.