Profile
Blog
Photos
Videos
No nervöser bini am Morge ufgstande und vin min Lebenslauf go usdrucke und go zmörgele. Am halbi Zwölfi isch min Koffer acho. Gott sei Dank, hani dBusinesschleider nöd liefere lo sondern selber mittreit. Süsch wäri wohl fasch verzwiiflet. E Stund spöter bini i de U-Bahn ghocket richtig Umeda. Da ich sGspröch ersch am 3 han bini no ines Kafi ghocket. Ich bin wohl so vertüüft gsi i de Vorbereitig, dass ich nachher us em Kafi i di falsch richtig gloffe bin. Das Osaka tuet mer nöd guet. Ich han mi jetzt in Japan zweimal verloffe. Bedesmal in Umeda, Osaka. Nur vier Minute vor em Gspröchstermin bini bim Gebäude acho. Im zweite Stock isch dFirma Freeplus gsi. Es isch e Inbound Tourismus Organisation, wo Gruppe-, Individual- und Gschäftsreise verastaltet und vertribt. Bsunders begeischtert bini allerdings über ihri Bemühige s'interkulturelle i ihres Tagesgschäft izbinde. Si suechet öppert für Internationale Sales, jedoch mit Business Japanisch. Dadur und en Umstand, dass sganze Gspröch ebe in Japanisch het selle statt finde, hani nöd dra glaub, dass es en Erfolg würd si. Aber bis zu dem Ziitpunkt hani so vill Ziit inveschtiert, dass ich das wenigschtens als Erfahrig chan abtue.
De Iigansbereich isch Hammer gsi. Ähnlich wie es traditionells chics Japanisch-Restaurant. Mit gedämpften Liecht und au e traditionells Zimmer für chlini Sitzige. Ufere Süüle am Iigang isch en chline Bildschirm gsi, wo drü verschideni Gäscht willkomme gheisse worde isch. Darunter ich. Die vilä Nämä hend scho e Vermuätig provoziert...
Mit em Telefon drunter han mi agmulde und bin ines Sitzigszimmer gfüehrt worde. Drin isch scho en Koreaner ghocket - Vermuätig het sich bestätigt. Es git es Doppelbewetbigsgspröch. Er het es super Japanisch anegleit. Ja, er het halt scho in Japan gschaffet. SGspröch het us drü Frage bestande: Stell dich selber vor?, Wieso möchtisch bi Freeplus schaffe? Häsch no Frage? Überrascht vo dere Direktheit, hani die wichtig überzügende Argument vergässe. Nachere Viertelstund sind mir bedi wieder verusse vor em Gebäude gstande.
Über die 100% igi Pleiti hani nur chönne lache und bin uf em schnällschte Wäg zrugg is Hotel. Es isch somit bestumme, dass ich zrugg id Schwiiz go und det en Job sueche.
De Rescht vom Tag hani demit verbracht, mini letschte Täg grob zplane und im aktuelle Stelleagebot i de Schwiiz zschmöckere.
U-Bahn: 8 km
- comments