Profile
Blog
Photos
Videos
Hallo zusammen
Puuhh, das isch en meega astraengende flug gsi... woni in brisbane ha welle ufstoh hani fast nuemi choenne laufe. Am Flughafe het uns oeper wo o bi dr Schuel agstellt isch abgholt und zu unserne Gastfamilie gfahre. Doert hani denn 3 Schwiizer kenneglernt wo o in Noosa ind Schuel goend.
D Familie isch mega naett, d Gastmuetter isch no chliner als i (dass das ueberhaupt moeglich isch... :-). Sisch sehr eifach mit ihne zschwaetze, o wenni no vili Fehler mach und maengisch komischs Zuegs useloh. Aber bis jetzt haend mer uns immer verstande :-) Si haend o no e Hund, si heisst Bindy und isch sooo haerzig.
Anschinend isches do normal, dass me am Weekend nur vor dr Glotze umehoggt oder duet Playstation spile. Drum hani gester daenggt, i gang biz an Strand. Woni hei gluffe bi, hani daenggt i probiers mol miteme andere Waeg, drmit i d Stadt biz kennelern... Naja ha mi total verluffe und bi ueber e Stund im Cacao ummegluffe. E Frau het denn aghalte und gmeint, i gsech biz verlore us und het mi denn zu dr Gastfamilie gfahre :-)
Huet hani min erst Schueldaag gha, wieni erwartet ha, isch ebe d Haelfti vo de Schieler in minere Klass o us dr Schwiiz :-) Aber mir haend miesse e Formular unterschribe, dass mer an dr Schuel nur Aenglisch redend, sunscht wird me vom Unterricht usgschlosse.
Huet Zmittag gangi no mit dene 3 Schwiizer an Strand und zobe goend mer denn ins Irish Pub, doert gits jede Mentig e grossi Party :-)
Wuensch euch en schoens Daegli.
Liebe Gruess, Vanessa
- comments
Ruth Lieb Vanessa, i ha e mega Freud gha vo dir z'höre und bi froh, dass gsund acho bisch! ...und e Schutzängel hesch o scho gha, i mein die Frau wo di wieder "hei" brocht het. Machs guet, i freu mi scho jetzt, wieder Neuigkeite vo dir z'höre und mäld mi denn gli per mail. Griessli Ruth