Profile
Blog
Photos
Videos
Hola chicos!!
Mit Wehmuet hend mer Fiji verlah und hend die lang Reis uf Suedamerika in Agriff gno. Sechs Stund Ufenthalt am Flughafe vo Neuseeland und en 12 Stunde Flug mit de zimlich simple argentinische Airline. Die einzig Unterhaltig sind d'Sicherheitsbestimmige vo de Stewardesse gsi...kei Film oder Spieli...
Es isch scho genial, wenn mer am Dienstagabig abfluegt, 12 Stund i de Luft isch und denn am gliche Tag am Namittag am neue Ort achunt...das nennt mer efizients Reise :)
De Kulturschock vonere einsame Insle zunere Grossstadt (Buenos Aires) und zudem vo heiss zu chalt, isch perfekt gsi. Zum Glueck het d'Vicky fuer ues Ziit gha und euse Touriguide gspielt. Chum het sie ues eleige glah, sind mer au scho in falsche Bus igstige oder hend d'Bushaltestelle verpasst. Eifach echli ueberforderet i sonere Grossstadt :) Danke Vicky!!!
Buenos Aires isch eifach genial. schoeni Paerk, gemuetlichi Strassekafis, freakigi Luet, Tango, verschiedeni schraegi Viertel und di beste Kueh uf de Welt (natuerlich nur uf em Teller :) Nachere Wuche Buenos Aires hend mer ues entschiede mit em Nachtbus richtig Norde zfahre. Mir hend ues guet uf die lang Busfahrt (10 Stund) vorbereitet und zwar a la India, zesse, ztrinke und e Wulldechi, alles debi...doch de Bus isch so oeppis vo luxurioes gsi, dass mer gar nuemme hend welle usstige. De Ruego het beschlosse, dass er lieber mit em Bus id Schwiiz fahrt, als mit de argentinische Airline :-)
Uese noechsti Stopp isch Cordoba gsi. Es isch zwar en Millionestadt, aber mer het sGfuehl mer isch imene chline koloniale Staedtli. Vill Strassekafis und jede Mengi Argentinier bim Kafi trinke und quatsche. D'Polizistinne in Cordoba sind am Ruego sini Favorite und er het immer welle vo ihne verhaftet werde...aso, aso...Mega vill ussert Citytour, Kafi trinke, Fleisch esse und is Che Muesum hend mer ned gmacht. Bechlaut sind mer no nie worde (Holz alaenge), aber de Ruego wird da zum chline Dieb. Am Strasserand hets immer Manderinebaeum (so gsend zu mindestens us) und er het ned choenne widerstah so eini zstibize. Doch Gott straft sofort und er het mindestens zwei Stund lang Buchweh gah. Vermuetlich sind die Manderindli gar ned essbar...
Da ues Busfahre jetzt so guet gfallt, sind mer grad wieder 12 Stund wiiter gfahre nach Salta, i de Hoffnig dass es mal waermer wird (am Abig um di 10 Grad). Aber s'erste wommer gseh hend sind Luet mit Chappe und Schnee i de Berge. Uppps wohl en Fensterplatz i de Klimakund gha :-) Aber fertig gjammeret, denn huet Namittag hend mer beidi en Sunnebrand gholt :-)
Zweiter Teil Argentinien folgt...Adios
- comments