Ko Tao... das Paradies auf Erden... echt schoens Flaeckli do!!! Chli aber perfekt! Ihr werdet d Photene gseh....

puuhhhh... die letschte paar Taeg sind astraengend gsi und eg ha ueberhaupt ke Ziit gha ueber irgendwas noche z daenke... han mis Tauchprevet gmacht! Hoet han i uebrigens s Final Exam (Schlusspruefig) mit 50 Froge und nur 4 Fehler bestande jupppppiiiii.....! Min Tauchlehrer het mi gruehmt und gmeint, er heigi scho ziemlich lang niemert me gseh, wo so guet mit em Surstoff umgoht als Afaenger wien eg! Bi grad chli stolz gsi... han mir ou guet ufs Schnuufe konzentriert... langsam, stetig und nie ufhoere... Bin also jetzt Taucherin! Ha aber 3 Tag voll Program gha! Es Buech vo 200 Siite laese und jede Tag mindischtens 2 Tauchgaeng wo mir Uebige unterwasser gmacht hend wie Maske abnaeh, alegge und leere, Prozedere wenn d Luft usgoht etc. Hoet bin i fertig und eg glaube eg mache grad no 2 Tag s Advanced Diving dermit i uf 30 Meter abe cha! Jetzt doerf i international uf 18 Meter abe! Die Unterwasserwelt isch eifach faszinierend! Han scho ganz ganz voeu verschiedeni Fisch gseh ou grossi wow... das isch was ganz Neues! Hoet bin i sogar vo eim attackiert worde... wo sini Eier beschuetzt het. Bin i sis Territory cho... denn bliibt me eifach ruhig und schwimmt am Bode entlang wiiter... aber dae Cheib chan zuebisse han i nochaer ghoert... aber dr Diving Instructor isch jo debi gsi und het mir gholfe! Be ar Oberflaechi aber soooooo Seekrank worde, dass i zwoesche jedem Tauchgang wieder ueber d Rehling kotzt han...puuuhhh... jetzt bin i fix und fertig! Das sind 3 astraengendi Tag gsi, voller Theorie und Tauchgaeng! Aber es het mir ganz e neui Welt eroeffnet... wunderschoen! Bin froh, han i mini Angst trotzdem, nach mine afaengliche Panikattacke wenn me so wiit unter Wasser isch, ueberwunde...Aber die erschte 10 Minute han i echt daenkt.... scheisse, was mach i do... am 2. Tag isch aber scho viel viel besser gsi, und es het sich agfuehlt wie wenn i no nie oeppis anders gmacht haet - echt cool!

Hoet bim 4 Tauchgang han i sogar en Unterwasserkamera gmietet und han probiert in 18 Meter Tiefe Phoeteli z mache... das isch aber unter Wasser ziemlich schwierig, woeu die Fisch ziemlich schnell sind, und eg nonig so superruhig chan tauche wie en Profi etc. Mou luege oeb die Phoeteli was worde sind!

Die erschte ganz liebi Gruessli als prevetierti Taucherin!

Fabienne