Profile
Blog
Photos
Videos
So, itz hätte mrs auso gseh das Sydney. Isch würklech guet gläge gsi dä Campingplatz bim Lane Cove Nationalpark. Öppe e Kilometer düre Waud am Friedhof entlang u när bisch scho fasch bim Bahnhof, dert no e haub Stung mit em Zug u voilà, zmitts ir City.
Dert simer irgendwenn nachem Mittag mau acho u hei üs ufe Wäg zum Hydepark, auso Richtig Opera gmacht. Naja, isch o nid grad viu Bsunders a dere Stadt. Eifach e Horde wüeschti Hochhüser. Zwüschdüre hets zwar so härzigi auti Reihehüsli mit Hingerof u Bauköndli, aber o die sie öfters mau nid im auerbeste Zustand. Dr botanisch Garte isch drfür schön, mit jenschte uraute riesegrosse Böim. U nachdäm mr dert bis zum Wasser füre si glüffe hei mr se plötzlech vor üs gha - di wäutberühmti Opera. Aber o die hätte mir üs gloub beidi e chli iidrücklecher vorgsteut. Mir hei üs när überleit, ob si äch bi schöner Wätter besser hät usgseh. Schliesslech hei mr sit mr id Nächi vo Sydney si cho keh Sunne meh gseh. U am Morge vorher, wo mr vom letschte Campingplatz si abgfahre no 33 Grad... Vielech ischs aber o eifach dran gläge, dass mr scho sooo viu hei gseh wo me süsch nume vo Fötteli u Fernseh kennt, dass mr haut nüm so liecht z beidrucke si.
Immerhin hei mr ke Sunnestich riskiert uf üssere Tour dür d Stadt. Nume grad die ganze Stäge ufe im einte Pfoste vor Harbourbridge hei üs chli zum schwitze bracht. Knapp 90 Meter ufe, hett scho e ganz gueti Ussicht übere Hafe gä. U uf jedem Bode innerhaub vom Turm Infos zum Bou vor Brügg. 16 Bouarbeiter hei müesse stärbe derfür. Abekeit si aber nume zwe, ke Ahnig was mit de angere 14 isch passiert.
U nach däm asträngende Marsch dür Stadt u däm Ufstieg si mr mau wieder a Afang vor Brügg, zu the Rocks. Das isch ds äutischte Quartier vor Stadt, auso dert wo die ersti Siedlig u so ou die erste Pubs sie entstande. Die si mr när o ga sueche, schliesslech isch mau Zyt gsi für ne Belohnig für die herti Arbeit. Auerdings hei die zwöi aute Pubs vo inne zwar ganz guet usgseh, aber dusse nid viu gschiids. Drum si mr zrügg zu däm Rooftop Beergarden wo mr vorher mau hei gseh u dert när o veiechli blibe hange, bi chli Bier, em ne Steak u Ussicht uf d Opera im Sunneungergang. Aber die isch üs irgendwie geng no nid bsunders speziell vorcho...
Irgenwenn hets üs dünkt, müesse mr mau o no es angers Plätzli usteste. Wo mr hei wöue gah het dr Role aber ufem Klo no d Bekanntschaft vo zwe Schwyzer gmacht. Die hei üs so lang ufghaute, dass mr scho wieder Durscht hei gha us drum nume grad über d Strass zum nächste Pub hei gschafft. Die hei ganz spezielli Bier gha u das wo mr hei probiert, ds Bier vom Monet, mit em ne Bananae Näbegschack. Tönt vielech komisch, isch aber mega lecker gsi!
Trotzdem hei mirs bi däm la bewände, hei ja no chli meh vom Nachtläbe wöue gseh. Auso hei mr mau afa umewirre. Isch ja Mänti Abe gsi u mir plötzlech meh im Schopping- u Büro-Gebiet glandet, auso nüm viu mit Nachtläbe. Es letschts Pub u no mau es angers leckers Bettmümpfeli hei mr no gfunge bevor mir üs mau ufe Wäg zum Bahnhof hei gmacht. U so guet gnährt wie mr si gsi, isch d Heifahrt mit em Zug u dr Spaziergang am Friedhof entlang o gäbig gange, obschons scho die längsti Zyt am schiffe isch gsi.
Am nächste Morge si mr ömu mau nid erwacht wüus zheiss isch gsi, es isch nämlech geng no aus verhanget gsi. Trotzdäm hei mr üs mau ufe Wäg gmacht, hei ja id Blue Mountains wöue ga Ussichtspünkt u Wasserfäu luege. Aber je meh dass mr id Höger si cho desto weniger hei mr gseh u desto gröber hets wieder afa schiffe. Auso hei mr üs entschiede, d Ussicht u so uf e nächst Tag zverschiebe u mau ab ufe Campingplatz zum chli dr letscht Tag verdoue. Am 4i simer scho dert gsi u hei mau afa luege, was me di nächste Tage no so chönt mache, süsch no chli umegnuschet u scho isch Zyt gsi für Znacht. Guet ikouft hei mr no ungerwäx, es isch nämlech Ris mit Cider-Poulet ufem Plan gstange. U abgseh vom versauznige Ris o mega lecker gsi.
Gschiffets hets immer no u geng wie chäuter worde. 10 Grad hei mr ömu sicher nümme gha u weder e Heizig no viu zum zuedecke im Eddy. Läck hei mr i dere Nacht a Ranze gfrohre!!!
U am nächste Morge no kes Mü besser. Auso hei mr üs entschiede, nid no töifer i di Bärge zfahre u hei das mit dr planete Höhlebesichtigung mau la si. Am beste wieder Richtig Küste u gäg Süde, mau no as paar Ussichtspünkt afahre u luege was es z luege git. Näbu u Räge hets z luege gä u ab und zue so chli töifi Schluchte (ömu het me chönne erahne dass si töif währe) u mit viu Glück sogar mau e Feuswang vis-à-vis. U vor auem überau Fötteli wo dr unger d Nase binge wie schön dass es wär wenns schön wär. Auso um so meh mau wäg vo dene Höger.
Aber o wo mr ändlech ar Küste wär gsi hets no nid viu besser usgseh. Hei e Strass gno wo herrlechi Ussicht über d Klippe hätt gha, immerhin chli ufs wäuige Meer abe gseh aber süsch o nid viu meh aus Räge.
Schliesslech hei mr üs entschiede, die Nacht im ne Winterquatier zverbringe u hei üs uf d Suechi nachere zaubare Cabin gmacht. Zwar hets när tatsächlech mau ufghört schiffe u ab und zue het me sogar es Bitzeli blaue Himu gseh aber wo mr hie bi däm Holiday Park ds Gerroa si acho u üs das nätte Modi ar Reception so nes Hüsli für 100$ het abotte hei mr glich nid chönne nei säge.
U so hocki itz hie schön im warme, so zsäge im ne 3-Zimmer-Logis, bim ne Gläsli Cabernet us South East Australie u ha grad z beste Erlebnis vo de letschte paar Tage hinger mir: e Portion Teigaffe mit Broccolirahmsauce! Auso itz no üses Bauköndli ga gniesse, vielech no chli TV-Abe u när es richtigs schön warms Bett - yeah!!!
- comments