Profile
Blog
Photos
Videos
Ich bin so rasch i das Kofu gange, damit ichs no i de Herbschtpracht gse. Es het nämli e schöni Flussschlucht, wo bsunders während de Momiji-Ziit empfehlendswert isch. Da mer eigentlich seit die isch so bis Mitti November, han ichs nöd wellä verpasse. Zersch gits natürli en feine Kafi. Die Stadt het en schöne Mix zwüschet internationale Iiflüss und trotzdem immerno die traditionelle Imbiss und Restaurants. Mir gfallts da i de Yamanashi- Präfektur. Es heisst sovill wie Bergbire. No cool oder? Fasch wie Moschtindie, nur offiziell. Die Prefektur sprüht nur so vo Natur-Schönheite. Leider han mi uf öppis müesse begrenze. Ich bin also miteme vollgstopfte Bus und eme unmögliche Busfahrer, stehend e halb Stund in Hogger ufebracht worde. Da dSicht als relativ guet igstuft han, hani entschide mit em Seilbähnli uf en Hogger namens Shosenkyo ufezgo. Dehinder stoht e Legende vonere Üüle. Sovill ich verstande han, isch en arme Wanderer hungrig uf en Felsenufekletteret, um a Truube zcho. Wieder dune het er sis einzige Mahl mitere Üüle teilt. Die het en denn ine weisi Üüle als Beschützer vom Berg verwandelt. Aber irgendöppis hani wohl nöd verstande...schliesslich isch das nöd unbedingt e Ehr oder e Belohnig. E Interneterchlärig hani denn gfunde: Dä Ma het welle Zauberer werde und het denn mehreri Tag uf dem Berg verbracht, damit sich dä Traum erfüllt. Bim abechlättere het er hunger becho und het er ufeme Felse e goldeni Truube gfunde. Er het zwei Truube gpflückt. Eini gässe und die ander ipackt. Underwägs het er e erschöpfti Üüle troffe und het ihre dTruube gä. Denn het es gidigs Glöggli glütet und die Üüle het ihn als Belohnig für all die Strapaze ine goldigi Glücksüüle verwandelt. Drum hend vill Japaner es goldigs Glöggli mit sich - au ich es Schwiizer.
Dobe hets zwei chlini Schrein, de eint ganz normal am Gott vo de Hochziit gwidmet und bim andere tuet mer Pauke und denn söll mer vermögensmässig guet gstellt si. Vo verschidene Pünkt us het mer de Fuji möge gseh. Dummerwiis isch dSunne au fasch uf dere Richtig gsi und dFöteli somit nöd grad de Hammer. Aber das het dMagik vo dem Vulkan nöd möge schmölere. Es het dobe öppe 10 Minute Weg ge. Au no Wanderweg zu de Nachbarberge, aber das liit ziitlich nöd drin. Nacheme Stündli dobe bini wieder talwärts. I de Talstation hets im Souvenirlade agmalni Stei gha. Uf dene sind Chatze, hünd und Üüle druf gmacht gsi. Aber so unglaublich imene 3D Effekt, dass es usgseh het wie echt. Ich han frecherwiis es Föteli gmacht. Atemberaubend echt gsehts eifach us.
300m vo de Talstation fangt de Flussspaziärwäg a. Natürli igleitet vo diverse Souvenirläde.
DHauptattraktion isch de Sengu Wasserfall mitere Fallhöchi vo 30m. Er isch grad nach de Souvenirläde. Danach hets öppe en 1 km Spazierewäg wo immerwieder e chlini Attraktion het entlang e schöne Schlucht. Ich bin mit Sammle vo gäle Gingko und orange bis rote Miniahornblätter beschäftigt. Es het es paar Tourischte gha. Fasch am Endi vo dem Hauptweg isch no es Äffli ufene Stuähl agleint gsi. Isch natürli herzig gsi. Danach bini no de Flussweg wiiters. De isch praktisch leer gsi. Nach zwei Kilometer bini anere Brugg verbi cho, wo Hammer usgseh het mit de Herbschtlaub rundum.
I de nöchi vo dere Brugg isch dBusstation gsi. Au de Bus retour isch so voll gsi, dass mer het müesse stoh. Unterwegs sind denn no lokali älteri Lüüt igstige, die kein Platz becho hend. Und bi dere üble Fahrwiis kriminell. Das mer nöd en Express an Wasserfall zuesätzlich macht, isch nöd verschtändlich. Me het löcker zwei Büs chönne fülle. Richtig schad. Aber mer sind alli heil am Bahnhof acho und da ich no nächli Ziit gha han bini in Norde vo de Stadt gloffe, zum städtische Hauptschrein. Danach bini zumene grosse Nachbarschrein gloffe. Underwägs het mi en Hund agumpet, als hetti Hundeguetsli debii gha. Komisch. Aber en Schnüggel isches gsi. Leider aber zspat gsi für en Schrein-Stempel. Aber dSchönheit vom Schrein umrundet vo herbschtlich fabige Bäum und prächtige Chrisantheme wird mir au so in Erinnerig bliibe. I de Dämmerig bin i zrugg is Hostel.
ZFuäss: 17km, 23600, Bus: 20km
- comments