Profile
Blog
Photos
Videos
Nachdem ich weder am Sunntig no Mäntig deziit gha han mini bis da ane gschobeni to-do's zerledige hani mich mit dem beschäftigt. Usserdem hets no en letschte Hoffnigsschimmer in Sache Japanjob ghä. Ich han zwei Täg spöter es Vorstelligsgspröch in Osaka. Da ich ja de Japan Railpass han chani guet dur Gägend jette. Nur wird mir jetzt binde letschte Planig bewusst, was ich alles verpasse respektiv nöd wird dezue cho zum entdecke. Aber da no Wöschmorge agseit gsi isch, bini chum dezue cho zum Plane.
Am Mittag bini nach Akihabara gfahre. Ich han det mit em Öschtricher abgmacht, woni in Kyoto id Schuel bin. Mer sind zämä ines Üülekafi. Aaso es isch me e privati Üülehalrig gsi. Will sKafiagebot het useme Automat bestande. Denn hets es paar Aquarium als Ruumteiler gha. Ein welsartige Fisch vo öppe 60cm Längi het es 35cm tüüfs Glaschäfig gha. Wenn er sich also het welle dreihe, hett er en Hinderschisalto müesse mache. De Ruum isch mit zig künschtlichi Pflanzedekos zumene Urwald gmacht worde. Im hintere Ruumteil sind öppe 15 Üüle gsi. Verschidenschti Arte, aber mer het wohl nur die chline dörfe hebe. Vo de grosse het mer sogar es paar nöd dörfe alange. Mer hend denn zersch en 15cm grosse Schnügel mit rote Auge uf em Handglänk gha. Ich bin so fasziniert gsi, dass ich en ganz nöch ghebt han. Dummerwiis het si sich denn uf mim Rock erliechteret. Aber für öpois treit mer ja Füechttüechli ume und dÜülepfleger sind au usgrüschtet gsi. Aber es isch glich so en Schnüggel. Dana isch no e nöiseeländischi uf mim Handglänk ghocket. Im Ruum hets meischtens zwei von de gliche Üeleart gha. Schleierüüle sind natürli speziell gsi, aber am liebschte und am flauschigschte isch de Steinkauz gsi. Nacheme Stündli isch denn üsi Ziit verbii gsi, aber üs hets au langsam glanget. Weniger de Üüle wege sondern es het mi die blau blinkendi Liechterchetti und de Fernseh, wo Disney gloffe isch, ufgregt. Ich chan mer nöd vorstelle, dass das so tiergrecht isch. Ich han spöter erfahre, dass sich dBsitzer vomene Üülekafi in Osaka meh ums Wohlbefinde vo dem schöne Fädervich kümmeret.
Mer hend ja denn immernonig en Kafi gha also sind mer ines anders speziells Kafi. Es isch uf em Perron vomene stillgleite Bahnhof. All paar Minute fahrt Hauptstadtzuglinie verbii. Ganz cool.
Am früe Obig bini denn inen andere Stadtteil. Ich han mit minere Kollegin vo Schwiiz Tourismus zum zNacht abgmacht. Si het momentan vill um dOhre, aber da es vorussichtlich min vorläufig letschte Ufenthalt in Tokyo isch, het si sich glich Ziit gno. Toll, nöd?
Nachem feine Ässe bini zrugg is Hotel. Ich han no e Teilnachtschicht vor mir. Im Mail vo dere Firma von Osaka stoht au, dass sganze Gspröch in Japanisch wird stattfinde und ich söll min japanische Lebenslauf mitnä und abgä. Bis jetzt hani nebscht em Begleitbrief nüt i mim Dossier vollständig uf Japanisch gha. So hani halt allles no müesse übersetzte und bin ersch am halbi Vieri go schlafe. K.O. natürli.
Zug/U-Bahn: 35km
- comments