Mir si wieder ä Biz vorwärts chö u si mitem Ado Bus vo Tulum nach Playa del Carmen greist (ca. 1h Fahrt). Mir müesse sägä das Bussystem in Mexiko isch genial, es isch sehr eifach hie zum umereise, günstig, bequem und derzue si de no pünktlech, 1A =P Eh ja item mir hei üs in Playa mit de 2 Schwizerinne, d Sabää uz Nici, wieder troffe u hei so gseit ä chlini Reunion ka. Mir si nämlech mitnä scho vo Buenos Aires bis nach Lima greist. U somit heimer üs gad 10 Tag es Hostelzimmer teilt, good price, good location & good vibes, was wotme no meh? Die meischti Zyt heimer eigentlech mit bade, sünnele, flanniere u feschtä verbracht :-) Wiemer eigentlech nur 10 Tag nöime id Ferie wäre gange.. hihihi ;-) Was mer näbscht däm no so gmacht hei: - Cenote Azul, das isch ä riisigi Cenote gsi u mega schön! Wüll mer mit Mexikaner si gange, heimer nume 4 Chf Itritt zahlt, schüsch wärs natürlech viel meh gsi ;-) - Akumal, dert simer ga schnorchle mit dä Schildkrötli, ganz kuul gsi. Chöimer also jedem empfähle! Mä cha guet mit der eigete Schnorchelusrüschtig ga u brucht also ke Guide, isch o besser fürs Portemonnaie ;-) - Kino, für gueti 2.80 Chf simer ga Shades of Grey 2 luege, sooo guet gsi! Was o ganz köstlech isch gsi am erste Abe womer da so ahnigslos dürd Gasse si gloffe, heimer per Zuefall z Schwizerpäärli wieder troffe (René & Vreni), womer in Guatemala hei kenne glehrt. Mir hei dänkt mir gseh nid guet, d Wält isch also scho chliiin :-)