Profile
Blog
Photos
Videos
Mir si wieder witers u das nach Ubud, iz Landesinnere mitts i Jungle vo Bali. Mal chli d' Kultur necher ga under d Luppe näh.
Mir hei gad dr glich Faher angaschiert wo mir scho letscht Mal hei ka u dä tüe mir gärn chli unterstütze. Für 20Chf het är üs vo Canggu nach Ubud gfahre (ca. 1.5h Fahrt). Unterwägs hei mir no bire Kaffi Plantage aghalte u mir si schön alles ga probiere u hei när sogar no Tee u Kaffi kouft, üse Platz isch zwar begränzt, aber uf das chunts ja iz o nümme druf a ;-).
Mir hei üs im Puji Hostel niederglah u das isch würk ganz äs kuuls Hostel gsi. Fründlechi u agnähmi Lüt und äs het ä Pool ka, wüll so bi 30 Grad ischs ner albe glich schön weme sech cha abchüele. ;-) Mir si imene 6er Zimmer gsi u hei o hie je 7chf zahlt pro Nacht und hei da kuuli Lüt kenneglehrt.
Ubud muess mä würklech gseh ha we mä in Bali isch, da het mä Mal o chli die andere Site vo Bali u äs isch z kulturelle sowie z künstlerische Zentrum vor ganze Insel. Es het irgendwie öpis magisches asech o wes so rächt touristisch isch.
95 % vo de Balinese si ja Hindus (schüsch in Indonesie si si Muslime) u somit finde täglechi Opfergabene u Zeremonie statt, da isch aso o no rächt interessant. O hie d' Balinese hei praktisch nüt, si verdiene so wenig (z.B ä Agstellte im Hostel verdient 3Chf am Tag), aber si trotzdem glücklech u z friede.
Ubud het so gseit o für jede öpis z biete: Tanzuffüehrige, Tämple, viel Yoga Klassene, Chochkurse, unendlech vieli Massage Salon's, sehr guets Ässä, kuuli Touren wo me cha mache oder eifach o nume relaxe. Alles geit da aso sehr guet. :-)
Was mir so gmacht hei:
- Affewald
Dr Monkey Forest isch es Muss weme sech in Ubud befindet (Itritt 3.65 Chf p.P). D' Affe si da sehr ad Mönsche gwanet u o das si gfüetteret wärde, mir hei da ner natürlech o Banane kouft u die si gwüss schlaui, die chlaue der d Banane sofort wede nid druf achtisch ;-)
Einisch si mir sogar attakiert worde, sehr amüsant gsi. Dr Wald isch riisig u es het no Tämple u alles u mä het öpe 1-2h bis mä alles gseh het.
- Ubud Market & lädele
Was mä sicher o muess isch bi däm riise Märit ga verbii luege, da chame schier alles choufe u sehr töif abemärte... üs hets eifach chle viel lüt ka u drum hei mir mehrheitlech schüsch ide Läde ikouft. Es het da nämlech es paar ganz kuuli Läde.
- Sunrise Hike Mount Batur (1700 M.ü.M.)
Am Morge am 02:00 Uhr hei mir für die Tour müesse ready si, zersch hets zur sterchig no äs Pancake gä u ner si mir öpe 1h Outo gfahre. Vor Ort si mir när no mitere Lampe und emne Znüniseckli ideckt worde u ner ischs losgange, 2h ufwärts u das bimene schittere Wäg (sandig u steinig), ir Schwiz wär das niemals underemne Wanderwäg düre gange haha. Es het rächt viel lüt ka, so das mä bim ufewandere ab und zue het müesse warte, so gseit isches ä richtigi Massewanderig gsi u das isch chle müehsam gsi. Obe acho simer ner fasch abgfrore, wüll mir üs natürlech nümme bewegt hei, züm Glück hei mir aber ä Chappe drbi ka und hei üs mitemne Kaffi chönne ufwerme. Bim Sunrise hets ä paar Wolke ka, aber es isch trotzdem mega schön gsi :-).
Chum isch d'Sunne ner da gsi, si d Affe cho u hei sech uf z Ässe gstürzt, sehr köstlech gsi. Dernah si mir obe no chle umegloffe u hei chlei Gschichtleches erfahre u ner isch z Ganze wieder abwärts gange. Nach däm Hike si mir ner no zunere Kaffi Plantage gfahre u all si bim taste fasch igschlafe, verständlech nid?... Es isch ner no nid fertig gsi u mir si no uf Tagalang zu de Riisfelder u das isch wunderschön gsi! Natur Pur - Was fürne Vormittag, mir chöi das jedem empfähle u es het nur 20 CHF p.P kostet :-)
- Kecak Fire & Trance Dance
Mir si zämä mit Robert (üse Dütsch Kolleg) gane balinesischi Tanzuffüehrig ga luege u die isch öpe 1h gange. Triz u i hättes nach 10 min eigentlech scho gseh ka.. hahaha. z Ganze het üs chle ad Fuultier vo Ice Age erinneret, bi dene Grüsch wo si vosech hei gäh. Eh ja die 5.50 CHF hättme sicher besser chönne investiere, aber jänu :-).
Hie no d' Restaurants wo mir chöi empfähle (guet u günstig):
- Warung Boga Sari (Balinesische food)
- Biah Biah (Balinesische food)
- Warung Siam (Thai food)
- Coffe & Co. (würk wältsfeine Kaffi)
- Laughing Buddha (jede Abe Live Music)
Was o sehr köstlech isch gsi, mir hei üse Abreisetag versifft haha mir hei üs eifach am Tag girrt u si gmüetlech a däm rägnerische Tag am Netflix luege gsi u plötzlech isch dä vor Reception cho, mir hätte hüt üses checkout.... Mir ner beidi so: "Neei mir gö doch ersch Morn" hahaha. Ehja so chas ga, das isch üs also bis iz ono nie passiert. Mir hei när eifach halt spontan no ä Nacht derzue buechet, mir si so :-).
- comments